చంద్రబాబుపై నాగం మళ్లీ ధిక్కారం, పార్టీ జెండా పెట్టేందుకు షరతు

By Pratap

Published: Saturday, May 14, 2011, 15:55 [IST]

హైదరాబాద్: పార్టీ పోలిట్‌బ్యూరో సమావేశంలో ధిక్కార స్వరం వినిపించిన తెలుగుదేశం పార్టీ తెలంగాణ ఫోరం కన్వీనర్ నాగం జనార్దన్ రెడ్డి మరోసారి పార్టీ అధ్యక్షుడు నారా చంద్రబాబు నాయుడిపై తిరుగుబాటు ప్రకటించారు. తమ తెలంగాణ నగారా సభల్లో పార్టీ జెండా ప్రసక్తే లేదని స్పష్టం చేశారు. తమ సభల్లో పార్టీ జెండా పెట్టేందుకు షరతు కూడా విధించారు. తెలంగాణ రాష్ట్ర ఏర్పాటుకు కట్టుబడి ఉన్నామని చంద్రబాబు కేంద్ర మంత్రులు చిదంబరానికి, ప్రణబ్ ముఖర్జీకి లేఖలు రాస్తే తాము పార్టీ జెండాను పెడతామని, చంద్రబాబు ఫొటో కూడా పెడతామని ఆయన శనివారం మీడియా ప్రతినిధుల సమావేశంలో చెప్పారు.

తెలంగాణకు అనుకూలంగా నిర్ణయం తీసుకోకపోతే పార్టీకి మనుగడ ఉండదని చంద్రబాబుకు చెప్పినట్లు ఆయన తెలిపారు. ఈ నెల 21వ తేదీన పరిగిలో జరిగే తెలంగాణ నగారా సభలో కూడా పార్టీ జెండా పెట్టబోమని, తెలంగాణ ఉద్యమ జెండాను మాత్రమే పెడతామని ఆయన చెప్పారు. పార్టీ జెండా పెట్టాలని అడుగుతున్న నాయకులు తెలంగాణకు అనుకూలంగా చంద్రబాబు చేత లేఖ ఇప్పించాలని ఆయన అన్నారు. పార్టీలో తెలంగాణ సమన్వయ కమిటీ పెట్టాలనే ప్రతిపాదనను ఆయన ఎద్దేవా చేశారు. సమన్వయ కమిటీ అంటే ఏమిటో అర్థం కావడం లేదని, అందులో ఎవరెవరు ఉంటారో తెలియడం లేదని ఆయన అన్నారు.

Published On May 14, 2011