డిఎంకె పొత్తుపై చర్చించలేదు: ప్రధానితో భేటీ అనంతరం సిఎం జయలలిత

న్యూఢిల్లీ: కరుణానిధి ఆధ్వర్యంలోని డిఎంకె పార్టీతో కాంగ్రెసు పార్టీ సంబంధాలపై తమ చర్చలో ప్రస్తావన రాలేదని తమిళనాడు ముఖ్యమంత్రి జయలలిత మంగళవారం న్యూఢిల్లీలో ప్రధాన మంత్రి మన్మోహన్ సింగ్‌తో భేటీ అనంతరం విలేకరులతో మాట్లాడుతూ చెప్పారు. కేంద్రానికి, తమిళనాడు ప్రభుత్వానికి మధ్య స్నేహ పూర్వక వాతావరణం నెలకొంటుందని ఆమె స్పష్టం చేశారు. రాష్ట్రం అభివృద్ధి కోసం నిధులు కేటాయించాలని తాను ప్రధానిని కోరినట్లు ఆమె చెప్పారు. ఆందుకు ప్రధాని సానుకూలంగా స్పందించారన్నారు.

ఇటీవల కుంభకోణంలో ఇరుక్కు పోయిన కేంద్రమంత్రి దయానిధి మారన్‌ను కేంద్ర మంత్రివర్గం నుండి తొలగించాలని కోరినట్లు చెప్పారు. డిఎంకె పొత్తుపై చర్చ రాలేదన్నారు. ఆంధ్రప్రదేశ్ నిర్మిస్తున్న పలార్ డ్యామ్ పనులు నిలిపి వేయించాలని ప్రధానిని కోరినట్లు చెప్పారు. రాష్ట్రాల మధ్య వివాదాల పరిష్కారానికి కేంద్రం మధ్యవర్తిత్వం వహించాలని ఆమె కోరారు. కాగా అంతకుముందు ఆమెకు ప్రధాని మన్మోహన్ ప్రత్యేక వాహనాన్ని ఏర్పాటు చేశారు. అనంతరం ప్రధాని దగ్గరకు ఎలాంటి తనిఖీలు లేకుండానే ఆమె వెళ్లారు. తనిఖీలు లేకుండా నేరుగా ఆమె ప్రధాని వద్దకు చేరుకోవడం విశేషం.