ఆస్ట్రేలియాలో వివాహిత అనుమానాస్పద మృతి: భర్తే చంపాడని ఆరోపణ

హైదరాబాద్: నిజాబాబాద్ జిల్లాకు చెందిన ఓ వివాహిత ఆస్ట్రేలియాలోని మెల్‌బోర్న్‌లో బుధవారం అనుమానాస్పద స్థితిలో మృతి చెందింది. నిజామాబాద్ జిల్లా దోమకొండ గ్రామానికి చెందిన దేవేందర్ కుమార్తె వీణ బుధవారం ఉదయం మరణించింది. వీణ భర్త విష్ణు ఈ విషయాన్ని ఫోన్ ద్వారా తల్లిదండ్రులకు సమాచారం అందించాడు. నాలుగేళ్ల క్రితం మెదక్ జిల్లా సిద్దిపేట పట్టణానికి చెందిన విష్ణుతో వీణ వివాహం అయింది. ఆ తర్వాత నుండి వారు ఆస్ట్రేలియాలోనే ఉంటున్నారు. వారికి ఓ పాప కూడా జన్మించింది. ఆ పాప వయసు సంవత్సరం ఉంటుంది. గత కొంతకాలంగా వీణను ఉద్యోగం చేయాలంటూ భర్త విష్ణు వేధించినట్లుగా తెలుస్తోంది.

ఈ విషయాన్ని వీణ తన తల్లిదండ్రులకు గతంలో చెప్పినట్లుగా తెలుస్తోంది. ఈ విషయమై భార్యా భర్తల మధ్య పలుమార్లు ఘర్షణ కూడా చోటు చేసుకున్నదని సమాచారం. అయితే నాలుగు రోజుల క్రితం వీణ పురుగుల మందు తాగిందని, ఆమెను స్థానికంగా ఉన్న హాస్పిటల్‌లో చేర్పించారు. ఈ విషయాన్ని కూడా భర్త విష్ణు తల్లిదండ్రులకు సమాచారం అందించారు. అయితే బుధవారం మరణ వార్తను చెప్పాడు. దీంతో వీణ తల్లిదండ్రులు ఆమె భర్త విష్ణు పైనే అనుమానం వ్యక్తం చేస్తున్నారు.

English summary

A woman Veena was died in Melbourne of Australia today. Veena's parents suspecting it is murders by her husband.