తెలంగాణ అసందర్భ డిమాండ్: కావూరి సాంబశివరావు

By Pratap

Published: Wednesday, July 6, 2011, 17:27 [IST]

న్యూఢిల్లీ‌‌: తెలంగాణ రాష్ట్ర ఏర్పాటు డిమాండును కాంగ్రెసు సీమాంధ్ర పార్లమెంటు సభ్యుడు కావూరి సాంబశివరావు అసందర్భమైందిగా అభివర్ణించారు. తెలంగాణ ప్రజాప్రతినిధుల రాజీనామాలపై కాంగ్రెసు అధిష్టానం తీసుకున్న నిర్ణయం హర్షించదగిందని ఆయన అన్నారు. ఢిల్లీలో విశాలాంధ్ర మహాసభ ఏర్పాటు చేసిన సదస్సులో ఆయన బుధవారం సాయంత్రం ప్రసంగించారు. ఎన్ని రాష్ట్రాలని ఇస్తారని, జాతీయ స్థాయిలో ఓ విధానం తీసుకుని 500 రాష్ట్రాలు ఏర్పాటు చేసినా తనకు అభ్యంతరం లేదని ఆయన వ్యంగ్యంగా అన్నారు. రాష్ట్రాల విభజనపై ఒక విధానం ఉండాలని, అధికార ప్రతిపక్షాలు కూర్చుని ఆలోచించాలని ఆయన అన్నారు.

వెనకబడిన ప్రాంతాల అభివృద్ధి ముఖ్యమని ఆయన అన్నారు. వెనకబడిన ప్రాంతాలు అంతటా ఉన్నాయని వాటిని అభివృద్ధి చేసుకోవడం ప్రధానమని ఆయన అన్నారు. ప్రత్యేక ఉద్యమాల వెనక ఉన్నవారి ఉద్దేశాలను పరిశీలిస్తే ప్రస్తుత స్థితికి గల కారణాలు అర్థమవుతాయని ఆయన అన్నారు. స్వాతంత్ర్య సమరం జరిగిన కాలంలో ఆత్మత్యాగాలకు పాల్పడ్డారని, ఇప్పుడు ఆ పరిస్థితి లేదని ఆయన అన్నారు. తాను తెలంగాణ రాష్ట్ర ఏర్పాటుకు వ్యతిరేకమని ఆయన అన్నారు.

Published On July 6, 2011