భారీ పేలుళ్లన్నీ 13వ తేదీన్నే జరిగాయి

ముంబై: యాదృచ్ఛికమే కావచ్చు గానీ భారీ పేలుళ్లన్నీ 13వ తేదీననే జరిగాయి. ఎక్కువ మంది ప్రాణాలు తీసుకున్న పేలుళ్లు కూడా13వ తేదీనే జరిగాయి. పాశ్చాత్యులు 13 అంకెను దురదృష్టానికి చిహ్నంగా భావిస్తారు. కొన్ని దేశాల్లో పెద్ద పెద్ద భవంతుల్లో 13వ అంతస్తు ఉండదు. పన్నెండో అంతస్తు తర్వాత 14వ అంతస్తుగా పేర్కొంటారు. వీటిని పక్కన పెడితే - భారతదేశంలో గత మూడేళ్లలో జరిగిన నాలుగు దారుణమైన సంఘటనలు 13వ తేదీనే జరిగాయి. 2008 మే 13న జైపూర్‌లో వరుసగా 9 బాంబుపేలుళ్లు జరిగాయి. ఆ ఘటనలో 68 మంది బలి కాగా, 214 మంది గాయపడ్డారు.

అదే ఏడాది సెప్టెంబర్ 13న ఢిల్లీలో ఉగ్రవాదులు ఆరు బాంబులు పేల్చారు. ఇందులో 30 మంది మృతి చెందారు. 100 మందికి పైగా గాయపడ్డారు. 2010 ఫిబ్రవరి 13న పుణేలోని బేకరీలో జరిగిన పేలుడులో 17 మంది మరణించగా, 60 మంది గాయపడ్డారు. ఇక ఇప్పుడు మంగళవారం (13 తేదీ) ముంబైలోని జవేరీ బజార్, ఒపెరా హౌస్, దాదర్ ప్రాంతాల్లో వరుస బాంబు పేలుళ్లు జరిగాయి. అన్ని సంఘటనల్లోనూ పెట్టిన బాంబులన్నీ నిమిషాల తేడాలోనే వరుసగా పేల్చారు. బాగా రద్దీగా ఉండే ప్రాంతాల్లో, అదీ జనం ఎక్కువగా బయటికి వచ్చే సాయంత్రం సమయంలోనే ఇవన్నీ జరిగాయి.

English summary

Huge blasts in India were occurred on 13th date only. In these blasts death toll is also heavy.