మళ్లీ రాజీనామాలు చేస్తాం, స్పీకర్ చేతికే: ఎర్రబెల్లి

By Pratap

Published: Monday, July 25, 2011, 18:24 [IST]

హైదరాబాద్: తెలంగాణ రాష్ట్ర సాధన కోసం మళ్లీ రాజీనామాలు చేస్తామని తెలుగుదేశం తెలంగాణ ఫోరం కన్వీనర్ ఎర్రబెల్లి దయాకర్ రావు చెప్పారు. ఫోరం విస్తృత స్థాయి సమావేశం తర్వాత తెలంగాణ నాయకులు పార్టీ అధ్యక్షుడు నారా చంద్రబాబు నాయుడితో సమావేశమయ్యారు. ఆ తర్వాత ఎర్రబెల్లి దయాకర్ రావు మీడియాతో మాట్లాడారు. స్పీకర్ విదేశాల నుంచి తిరిగి వచ్చిన తర్వాత ఆయనకే రాజీనామాలు సమర్పిస్తామని ఎర్రబెల్లి దయాకర్ రావు చెప్పారు. స్పీకర్ నిర్ణయాన్ని వ్యతిరేకిస్తే జైలుకు వెళ్తారని ముఖ్యమంత్రి కిరణ్ కుమార్ రెడ్డి చేసిన ప్రకటనపై ఆయన తీవ్రంగా మండిపడ్డారు. కిరణ్ కమార్ రెడ్డి ఇంకా స్పీకర్‌గానే ఉన్నానని అనుకుంటున్నారని ఆయన వ్యాఖ్యానించారు. ఎంత మందిని అరెస్టు చేస్తారో చేసుకోమనండి అని ఆయన అన్నారు.

తమ రాజీనామాలను తిరస్కరించడం ద్వారా స్పీకర్ నాదెండ్ల మనోహర్ తప్పు చేశారని ఆయన అన్నారు. దేశంలో ఏ స్పీకర్ కూడా చేయని తప్పు ఆయన అన్నారు. సభ్యుల హక్కులను స్పీకర్ కాలరాశారని, స్పీకర్‌గా ఉండే అర్హత నాదెండ్ల మనోహర్‌కు లేదని ఆయన అన్నారు. స్పీకర్ నిర్ణయంపై తాము కోర్టుకు వెళ్తామని, అందుకు నలుగురితో ఓ కమిటీ వేశామని ఆయన అన్నారు. స్పీకర్ వచ్చిన తర్వాత రాజీనామాలు చేయడానికి అన్ని పార్టీల తెలంగాణ శాసనసభ్యులు ముందుకు రావాలని, క్యూలో నిలబడి రాజీనామాలు ఇద్దామని ఆయన అన్నారు. రాజకీయ సంక్షోభాన్ని సృష్టించి కేంద్రం దిగి వచ్చేలా చేయడానికి మూకుమ్మడిగా రాజీనామాలు చేద్దామని ఆయన అన్నారు.

Published On July 25, 2011