లగడపాటి రాజగోపాల్‌కి వైయస్ జగన్ వర్గం షాక్

By Srinivas

Published: Tuesday, July 26, 2011, 17:15 [IST]

విజయవాడ: బెజవాడ పార్లమెంటు సభ్యుడు లగడపాటి రాజగోపాల్‌కు తన సొంత జిల్లాలో మరోసారి వ్యతిరేకతను ఎదుర్కొన్నారు. జిల్లాలోని కంచికచర్ల మార్కెట్ యార్డును లగడపాటి మంగళవారం పర్యటించారు. ఈ సందర్భంగా ఆయన వైయస్సాఆర్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డిపై కాస్త విమర్శలు చేసినట్లుగా తెలుస్తోంది. దీంతో అక్కడ ఉన్న వైయస్సాఆర్ కాంగ్రెసు పార్టీ కార్యకర్తలు లగడపాటికి వ్యతిరేకంగా నినాదాలు చేశారు. జగన్‌పై విమర్శలు చేస్తున్న లగడపాటిని ప్రశ్నించారు. వారిని కాంగ్రెసు పార్టీ కార్యకర్తలు అడ్డుకునే ప్రయత్నాలు చేశారు. దీంతో ఇరువర్గాల మధ్య తోపులాట జరిగంది.

అయితే అక్కడే ఉన్న లగడపాటి నిస్సహాయ స్థితిలో ఉండిపోయాడు. వారికి సర్దిచెప్పలేని స్థితిలో ఉండిపోయాడు. అయితే స్థానిక నాయకులు కలుగజేసుకొని వారికి సర్ది చెప్పడంతో పరిస్థితి సద్దుమణిగింది. కాగా ఇటీవల లగడపాటిని అడ్డుకోవడం సహజంగా కనిపిస్తోంది. రెండు మూడు రోజుల క్రితం ఖమ్మం జిల్లాలోని ఓ కార్యక్రమానికి హాజరైన లగడపాటిని తెలంగాణవాదులు అడ్డుకున్నారు. దీంతో పోలీసులు పూర్తి భద్రతతో ఆయనను ఆ కార్యక్రమానికి హాజరుపర్చి ఆ తర్వాత పంపించేశారు. అంతకుముందు కృష్ణా జిల్లాలోనే కారులో వెళుతున్న లగడపాటిని జగన్ పార్టీ కార్యకర్తలు అడ్డుకున్నారు. అయితే లగడపాటి అనుచరులు వారి కారు అద్దాలు ధ్వంసం చేసి తరిమి కొట్టారు.

Published On July 26, 2011