నా ప్రతీకారం మాటల అర్థం అది కాదు: అక్బరుద్దీన్

హైదరాబాద్: ఇటీవల రంజాన్ మాసం ప్రారంభం సందర్భంగా తాను తన ప్రత్యర్థులపై ప్రతీకారం తీర్చుకుంటానన్న దానిని తప్పుగా అర్థం చేసుకున్నారని ఎంఐఎం శాసనసభా పక్షనేత అక్బరుద్దీన్ ఓవైసీ మంగళవారం అన్నారు. ముఖ్యమంత్రి కిరణ్ కుమార్ రెడ్డిని కలిసిన అనంతరం ఆయన విలేకరులతో మాట్లాడారు. అక్రమ కట్టడాలపై కోర్టు ఉత్తర్వుల మేరకు ప్రభుత్వం నిర్ణయం తీసుకుంటుందని చాంద్రాయణగుట్టలోని పహిల్వాన్‌కి చెందిన హోటల్ కూల్చివేత నిర్ణయంపై స్పందిస్తూ చెప్పారు. అందరికీ ఇదే విధానం వర్తిస్తుందని చెప్పారు. అలాంటి వాటిలో తన జోక్యం ఉండదని చెప్పారు.

మక్కామసీదు పేలుళ్ల కేసులలో ముస్లిం యువకులపై ఉన్న తప్పుడు కేసులు ఎత్తి వేయాలని ముఖ్యమంత్రిని కోరినట్లు చెప్పారు. పాతబస్తీ అభివృద్ధికి నిధులు అడిగినట్లు చెప్పారు. అలాగే పోటీ పరీక్షల కోసం శిక్షణా కేంద్రాల వంటి వాటి కోసం సిఎంను అడిగినట్లు చెప్పారు. హైదరాబాదులో చలాన్ల రూపంలో వస్తున్న డబ్బులలో 50 శాతం జిహెచ్ఎంసికి ఇవ్వాలని, హైదరాబాదుకు కృష్ణా నీటిని తీసుకు రావాలని ఆయన అన్నారు. తాను ప్రాణాపాయంలో ఉన్నప్పుడు తన కోసం పూజించిన హిందువులు, ముస్లింలకు, అండగా ఉన్న ముఖ్యమంత్రి, ప్రజలకు కృతజ్ఞతలు చెబుతున్నానన్నారు.

English summary

MIMLP Akbaruddin Owaisi clarified on his revenge statement today. He met CM Kiran Kumar Reddy today and talk with media after meeting.