వైయస్ జగన్ ఇంట్లో 80 గదులా?: చంద్రబాబు

By Srinivas

Published: Monday, October 24, 2011, 16:36 [IST]

హైదరాబాద్: రాష్ట్రంలో పేదలకు ఎనభై గజాల స్థలం లేదని కానీ కొందరికి 80 గదుల విలాస భవనమా? అంటూ తెలుగుదేశం పార్టీ అధినేత నారా చంద్రబాబు నాయుడు సోమవారం తెలుగు యువత వర్క్ షాప్‌లో వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డిపై ధ్వజమెత్తారు. ఆయాచితంగా వచ్చిన డబ్బు అలాగే పోతుందన్నారు. దోచుకున్న డబ్బులతో విలాసవంత భవనాలు కట్టుకొని ఉంటున్నారన్నారు. తన ఆస్తులను, తన కుటుంబ ఆస్తులను ఇదివరకే ప్రకటించానని చెప్పారు. ఉద్దేశ్య పూర్వకంగా తనను అప్రతిష్ట పాలు చేసేందుకే కొందరు తన ఆస్తుల విషయాన్ని ప్రస్తావిస్తున్నారన్నారు.

పోలవరం టెండర్ల ప్రక్రియ అవినీతిలో భాగమేనని విమర్శించారు. సమర్థుల కోసమే తెలుగు యువత అన్నారు. వచ్చే ఎన్నికల్లో యువతకు 30 శాతం సీట్లు కేటాయిస్తామని ప్రకటించారు. మా పిల్ల భవిష్యత్తు గురించి ఎలా ఆలోచిస్తానో పార్టీలోని యువత గురించి అంతకంటే ఎక్కువగా ఆలోచిస్తానన్నారు.

Published On October 24, 2011