ఆస్తులపై విచారణ:హైకోర్టు తీర్పుపై సుప్రీంకు చంద్రబాబు

By Srinivas

Published: Monday, November 14, 2011, 16:23 [IST]

హైదరాబాద్: తన ఆస్తులపై సిబిఐ ప్రాథమిక విచారణ జరిపి మూడు నెలల్లో నివేదిక ఇవ్వాలన్న రాష్ట్ర అత్యున్నత న్యాయస్థానం హైకోర్టు తీర్పుపై తెలుగుదేశం పార్టీ అధినేత నారా చంద్రబాబు నాయుడు సుప్రీం కోర్టుకు వెళ్లే యోచనలో ఉన్నట్లుగా సమాచారం. వైయస్సార్ కాంగ్రెసు పార్టీ పులివెందుల శాసనసభ్యురాలు వైయస్ విజయమ్మ మూడు వారాల క్రితం చంద్రబాబు ఆస్తులపై పిల్ వేసిన విషయం తెలిసిందే. సోమవారం హైకోర్టు బాబు ఆస్తులపై ప్రాథమిక విచారణ చేయాలని సిబిఐని ఆదేశించింది. విజయనగరం జిల్లా రైతు పోరుబాట యాత్రలో ఉన్న చంద్రబాబు తన యాత్రకు కాసేపు బ్రేక్ ఇచ్చి సీనియర్ నేతలతో సమావేశమయ్యారు. అనంతరం ఆయన తాను దేనికీ భయపడేది లేదని చెప్పారు. అయితే నోటీసులు ఇవ్వకుండా విచారణకు ఎలా ఆదేశిస్తారని ప్రశ్నించారు.

అయితే హైకోర్టు తీర్పును సవాల్ చేస్తూ సుప్రీం కోర్టు వెళ్లాలని ప్రాథమికంగా నిర్ణయించుకున్నట్లు తెలుస్తోంది. తెలుగుదేశం పార్టీ నేతలు కూడా కోర్టు తీర్పును స్వాగతిస్తూనే బాబు తరఫు న్యాయవాది వాదనలు పూర్తిగా వినకుండానే ఆదేశాలు జారీ చేశారని అసంతృప్తి వ్యక్తం చేస్తున్నారు. బాబు తనతో యాత్రలో ఉన్న నేతలతో పాటు ఇతర నేతలతోనూ టెలికాన్ఫరెన్స్ ద్వారా మాట్లాడి సుప్రీం కోర్టుకు వెళ్లాలనే నిర్ణయానికి దాదాపు వచ్చినట్లుగా తెలుస్తోంది.

Published On November 14, 2011