అది రాజకీయ కుట్ర: చంద్రబాబుకు నాగం బాసట

By Srinivas

Published: Monday, November 14, 2011, 16:53 [IST]

హైదరాబాద్: తెలుగుదేశం పార్టీ అధినేత, మాజీ ముఖ్యమంత్రి నారా చంద్రబాబు నాయుడు ఆస్తులపై వైయస్సార్ కాంగ్రెసు పార్టీ పులివెందుల శాసనసభ్యురాలు వైయస్ విజయమ్మ వేసిన పిటిషన్ రాజకీయ కుట్ర అని తెలంగాణ నగారా సమితి అధ్యక్షుడు, మాజీ మంత్రి నాగం జనార్ధన్ రెడ్డి సోమవారం అభిప్రాయపడ్డారు. రాజకీయ కుట్రలో భాగంగా వేసిన పిటిషన్ కాబట్టి ఇది నిలిచే అవకాశాలు లేవన్నారు. చంద్రబాబు ఇప్పటికే తన ఆస్తులు, తన కుటుంబ సభ్యుల ఆస్తులు ప్రకటించారన్నారు. ఆయన ప్రకటించిన లేదా సమర్పించిన వాటికంటే ఎక్కువగా ఉంటే సమస్య వస్తుందన్నారు.

ప్రస్తుతం నడుస్తున్న కేసులు అన్నీ రాజకీయ కుట్రలో భాగంగా జరుగుతున్నవేనని ఆయన అభిప్రాయపడ్డారు. చంద్రబాబు హైకోర్టు తీర్పును సవాల్ చేస్తూ సుప్రీం కోర్టుకు వెళ్లనున్నారనే విషయంపై స్పందిస్తూ ఆయన ఎలాంటి తప్పు చేయనప్పుడు విచారణ ఆపించుకోవాల్సిన అవసరం ఎందుకుంటుందన్నారు. కాగా సోమవారం మధ్యాహ్నం హైకోర్టు చంద్రబాబు నాయుడు ఆస్తులపై ప్రాథమిక విచారణ జరిపి మూడు నెలల్లోగా పూర్తి వివరాలు సమర్పించాలని సిబిఐని ఆదేశించిన విషయం తెలిసిందే.

Published On November 14, 2011