శ్రీలక్ష్మి సస్పెన్షన్, సిబిఐ కస్టడీలో ఆమెకు అనారోగ్యం

By Pratap

Published: Thursday, December 1, 2011, 10:20 [IST]

హైదరాబాద్: కర్ణాటక మాజీ మంత్రి గాలి జనార్దన్ రెడ్డి అక్రమ మైనింగ్ కేసులో అరెస్టయిన ఐఎఎస్ అధికారి శ్రీలక్ష్మిని ప్రభుత్వం సస్పెండ్ చేసింది. 48 గంటలకు మించి ఆమె సిబిఐ కస్టడీలో ఉండడంతో ప్రభుత్వం ఆమెను సస్పెండ్ చేస్తూ ఉత్తర్వులు జారీ చేసింది. ఆమె కుటుంబ సంక్షేమ శాఖలో పనిచేస్తూ వచ్చారు. సిబిఐ విచారణ ఉధృతమైన తాను అరెస్టు కావచ్చుననే భయాందోళనతో కొద్ది రోజులు ఆమె సెలవు కూడా పెట్టి, చెన్నై వెళ్లిపోయారు. తిరిగి వచ్చిన తర్వాత సిబిఐ ఆమెను విచారించి, అరెస్టు చేసింది.

కాగా, సిబిఐ కస్టడీలో ఉన్న శ్రీలక్ష్మి అనారోగ్యంతో బాధపడుతున్నట్లు సమాచారం. ఆమెకు సిబిఐ కార్యాలయంలోనే ఆరోగ్య పరీక్షలు నిర్వహిస్తున్నారు. తాను హృద్రోగినని శ్రీలక్ష్మి పలుసార్లు చెప్పుకున్నారు. దాంతో సిబిఐ విచారణ కూడా ముందుకు సాగడం లేదని అంటున్నారు. మూడు రోజుల పాటు శ్రీలక్ష్మిని తమ కస్టడీకి తీసుకున్న సిబిఐ అధికారులు ఆమె నుంచి సమాధానాలు రాబట్టడంలో తీవ్రమైన ఇబ్బందులకు గురవుతున్నట్లు తెలుస్తోంది.

Published On December 1, 2011