నల్లగొండ జిల్లాలో లాకప్ డెత్, ఉద్రిక్తత

By Pratap

Published: Saturday, December 10, 2011, 16:38 [IST]

నల్లగొండ: నల్లగొండ జిల్లా ఆత్మకూరు పోలీసు స్టేషన్‌లో ఓ వ్యక్తి మరణించాడు. వీరయ్య అనే వ్యక్తి హత్య కేసులో అరెస్టయిన కొమురయ్య పోలీసు స్టేషనులో అనుమానాస్పద స్థితిలో మరణించాడు. మంత్రాలు చేస్తున్నాడనే ఆరోపణతో గ్రామస్థులు వీరయ్య అనే వ్యక్తిని కొట్టి చంపారు. ఈ కేసులో పోలీసులు రెండు రోజుల క్రితం కొమురయ్యను అరెస్టు చేశారు. కొమురయ్య పోలీసు స్టేషనులో మరణించాడు. అతని మృతదేహాన్ని పోస్టుమార్టం నిమిత్తం సూర్యాపేట ప్రభుత్వాస్పత్రికి తరలించారు.

అయితే, కొమురయ్యను పోలీసులే హత్య చేశారని ఆరోపిస్తూ అతని బంధువులు పోలీసు స్టేషన్ ఎదుట ఆందోళనకు దిగారు. దీంతో ఉద్రిక్త వాతావరణం చోటు చేసుకుంది. పోలీసులు కొట్టడం వల్లనే కొమురయ్య మరణించాడని అతని బంధువులు ఆరోపిస్తున్నారు. తమకు న్యాయం చేయాలని డిమాండ్ చేస్తున్నారు. అయితే, టెలిఫోన్ వైర్‌తో ఉరి వేసుకుని కొమురయ్య మరణించాడని పోలీసులు చెబుతున్నారు.

Published On December 10, 2011