బాబు కేసు: సుప్రీంలో వైయస్ విజయమ్మకు చుక్కెదురు

By Srinivas

Published: Monday, January 16, 2012, 14:23 [IST]

న్యూఢిల్లీ: వైయస్సార్ కాంగ్రెసు పార్టీ గౌరవ అధ్యక్షురాలు, పులివెందుల శాసనసభ్యురాలు వైయస్ విజయమ్మకు సుప్రీం కోర్టులో సోమవారం చుక్కెదురైంది. తెలుగుదేశం పార్టీ అధినేత నారా చంద్రబాబు నాయుడు ఆస్తుల కేసును మరో హైకోర్టుకు బదలీ చేయాలని లేదా సుప్రీం కోర్టులోనే విచారణ జరిపించాలని విజయమ్మ వేసిన పిటిషన్‌పై సోమవారం సుప్రీం కోర్టులో విచారణకు వచ్చింది. పిటిషన్ తీరు న్యాయవ్యవస్థను కించపర్చేలా ఉందని కోర్టు వ్యాఖ్యానించింది. న్యాయవ్యవస్థ ప్రతిష్టను భంగపర్చకుండా ఉండేందుకు పిటిషన్ వెనక్కి తీసుకుంటారా లేదా తిరస్కరించమంటారా అని విజయమ్మ తరఫు న్యాయవాదిని కోర్టు ప్రశ్నించింది. దీంతో విజయమ్మ న్యాయవాది పిటిషన్‌ను వెనక్కి తీసుకున్నారు. ఈ సందర్భంగా కోర్టు నాట్ బిఫోర్ పద్ధతి అంతటా ఉన్నప్పుడు వేరే చోటకు బదలీ చేస్తే ప్రయోజనం ఏముంటుందని ప్రశ్నించింది. వేరే రాష్ట్రాలకు బదలీ చేస్తే అక్కడా ఇదే పద్ధతి ఉండదని నమ్మకమేమిటని ప్రశ్నించింది. వేసిన పిటిషన్ మొత్తం న్యాయవ్యవస్థపై దాడి చేసినట్లుగా కనిపిస్తోందని కోర్టు వ్యాఖ్యనించింది. ఇటువంటి పరిస్థితి తాము గతంలో ఎన్నడూ చూడలేదని పేర్కొంది.

కాగా చంద్రబాబు నాయుడు ఆస్తుల కేసును రాష్ట్ర హైకోర్టు నుండి ఇతర రాష్ట్రాలకు మార్చాలని వైయస్ విజయమ్మ సుప్రీం కోర్టును ఇటీవల ఆశ్రయించిన విషయం తెలిసిందే. రాష్ట్రంలో తనకు న్యాయం జరుగుతుందన్న నమ్మకం లేదని, ఇతర హైకోర్టు లేదా సుప్రీం కోర్టులో విచారణ జరపాలని ఆమె సుప్రీంను కోరారు. కాగా ఇటీవల హైకోర్టు చంద్రబాబు ఆస్తుల కేసు విచారణపై స్టే విధించిన విషయం తెలిసిందే.

Published On January 16, 2012