నో ప్లీజ్!:నాగబాబు, అల్లు అరవింద్‌లకు చేదు అనుభవం

By Srinivas

Published: Thursday, January 19, 2012, 12:43 [IST]

హైదరాబాద్: తిరుపతి శాసనసభ్యుడు చిరంజీవి సోదరుడు నాగ బాబు, బావ అల్లు అరవింద్‌లకు గురువారం రాజ్‌భవన్ వద్ద చేదు అనుభవం ఎదురైంది. అధిష్టానం గ్రీన్ సిగ్నల్ ఇవ్వడంతో శాసనమండలి సభ్యుడు సి.రామచంద్రయ్య, శాసనసభ్యుడు గంటా శ్రీనివాస రావు ఉదయం ప్రమాణ స్వీకారం చేసిన విషయం తెలిసిందే. ఈ ప్రమాణ స్వీకారోత్సవానికి నాగ బాబు, అల్లు అరవింద్ వచ్చారు. లోపలకు వెళ్లేందుకు పాసులు ఇవ్వడంతో అవి ఉన్న వారినే భద్రతా సిబ్బంది లోపలకు అనుమతించింది. ఇదే సమయంలో అక్కడకు వచ్చిన నాగబాబు, అల్లులను లోపలకు అనుమతించలేదని సమాచారం. ఉన్నతాధికారులు జోక్యం చేసుకోవడంతో వారిని లోపలకు అనుమతించారు. పదవీ స్వీకారానికి విశాఖపట్నం, కడప జిల్లాల నుండి భారీగా పిఆర్పీ కార్యకర్తలు తరలి వచ్చారు. వారిలో కూడా చాలామందిని లోపలకు అనుమతి లభించక పోవడంతో నిరాశకు లోనయ్యారు.

కాగా ప్రమాణ స్వీకారం తర్వాత కిరణ్ కుమార్ రెడ్డి మంత్రివర్గం గ్రూప్ ఫోటో దిగింది. ప్రమాణ స్వీకారోత్సవానికి చాలామంది మంత్రులు డుమ్మా కొట్టారు. చేనేత, జౌళీ శాఖ మంత్రి శంకర రావు, కడప జిల్లాకు చెందిన పలువురు నేతలు హాజరు కాలేదు. కేవలం ఇరవయ్యొక్క మంది మంత్రులు మాత్రమే హాజరయ్యారు. ప్రమాణ స్వీకారం సాదాసీదాగా, కేవలం అరు నిమిషాల్లోనే ముగిసింది.

Published On January 19, 2012