వారిని తీసేయొద్దు: బాబు హెరిటేజ్‌పై సిఎం ఫ్లాష్ న్యూస్

By Srinivas

Published: Friday, February 24, 2012, 18:21 [IST]

హైదరాబాద్: తెలుగుదేశం పార్టీ అధినేత, మాజీ ముఖ్యమంత్రి నారా చంద్రబాబు నాయుడుకు చెందిన హెరిటేజ్ కంపెనీపై ముఖ్యమంత్రి కిరణ్ కుమార్ రెడ్డి గురువారం అసెంబ్లీలో ఓ ఫ్లాష్ న్యూస్ చెప్పారు. ప్రభుత్వం ప్రతిష్టాత్మకంగా ప్రారంభించిన రాజీవ్ యువకిరణాల విషయమై సిఎం మాట్లాడారు. ఈ సందర్భంగా సిఎం, ఓ ఫ్లాష్ న్యూస్ అని అంటూ... ప్రతిపక్ష నేత చంద్రబాబుకు చెందిన హెరిటేజ్ కంపెనీలో రాజీవ్ యువకిరణాల పథకం కింద శిక్షణ పొందిన 616 మందికి ఉద్యోగాలు కల్పించామని చెప్పారు. ఈ వార్త ఇప్పుడే అందిందని, ఇదో ఫ్లాష్ న్యూస్ అని చెప్పారు. ప్రభుత్వం పథకం ద్వారా తన కంపెనీలో ఉద్యోగం పొందిన వారిని మాత్రం ఉద్యోగాల నుండి తీసివేయవద్దని బాబును కోరారు.

ఎవరెవరికి ఉద్యోగాలు ఇచ్చామో పూర్తి వివరాలు ప్రతిపక్ష నేత బాబుకు పంపిస్తామని చెప్పారు. కాగా గవర్నర్ ప్రసంగానికి ధన్యవాదాలు తెలిపే తీర్మానంపై గురువారం సభలో హాట్ హాట్‌గా చర్చ జరిగిన విషయం తెలిసిందే. ఈ సందర్భంగా చంద్రబాబు రాజీవ్ యువకిరణాలపై ఘాటైన విమర్శలు చేశారు. అందుకు సిఎం యువకిరణాలు వివరిస్తూ హెరిటేజ్‌లోనూ ఉద్యోగాలు కల్పించామని చెప్పడం గమనార్హం.

Published On February 24, 2012