కలుద్దాం రండి: కెసిఆర్‌కు రేవంత్ రెడ్డి సీటు ఆఫర్

By Srinivas

Published: Wednesday, March 7, 2012, 8:44 [IST]

హైదరాబాద్: తెలుగుదేశం పార్టీ శాసనసభ్యుడు రేవంత్ రెడ్డి తెలంగాణ రాష్ట్ర సమితి అధ్యక్షుడు, మహబూబ్ నగర్ పార్లమెంటు సభ్యుడు కల్వకుంట్ల చంద్రశేఖర రావుకు రాజ్యసభ సీటు ఆఫర్ చేశారు. అయితే ఆ సీటును ఆఫర్ చేసింది కెసిఆర్‌కు కాదు ఆయన సామాజిక వర్గానికి. మంగళవారం ఆయన అసెంబ్లీ ప్రాంగణంలో మీడియాతో మాట్లాడారు. ఈ సందర్భంగా ఆయన మహా కూటమి ప్రతిపాదనను తెర పైకి తీసుకు వచ్చారు. రాజ్యసభ ఎన్నికల్లో ఇటువంటి కూటమి కడితే కాంగ్రెస్‌కు భంగపాటు కలిగించవచ్చని మంగళవారం ఆయన ఇక్కడ అసెంబ్లీ లాబీల్లో విలేకరులతో మాట్లారు. వైయస్సార్ కాంగ్రెసు పార్టీ అధినేత, కడప ఎంపి వైయస్ జగన్మోహన్ రెడ్డి వర్గం ఎమ్మెల్యేల సభ్యత్వాల రద్దుతో అసెంబ్లీలో కాంగ్రెస్ సంఖ్యాబలం తగ్గిందని ఆయన అన్నారు.

సాధారణ సంఖ్యాబలం ఉంటేనే కాంగ్రెస్ నాలుగు రాజ్యసభ సీట్లు గెలుచుకోగలుగుతుందని చెప్పారు. ఇప్పుడు ఆ పార్టీకి నాలుగో సీటుకు సరిపోను ఎమ్మెల్యేలు లేరని, కాబట్టి టిడిపి, టిఆర్ఎస్, సిపిఐ, సిపిఎం కలిసి ఒక అభ్యర్థిని నిలబెడితే ఈ పార్టీలన్నీ కలిసి కాంగ్రెస్ నుంచి ఒక సీటును లాక్కోవచ్చునని చెప్పారు. అందరికీ ఆమోదయోగ్యమైన అభ్యర్థిని వెతికిపట్టుకోవడం పెద్ద కష్టం కాదని, కావాలంటే కెసీఆర్ సామాజిక వర్గానికి చెందిన టిడిపి నేతను పెడతామని చెప్పారు. కాగా టిఆర్ఎస్ ఇప్పటికే చచ్చిన పార్టీ అని దానిని చంపాల్సిన అవసరం లేదని ఆయన వ్యాఖ్యానించారు.

Published On March 7, 2012