రాపోలు ఆనంద భాస్కర్ ఎంపిక: కేశవరావుకు చెక్

హైదరాబాద్: సీనియర్ కాంగ్రెసు నేత కె. కేశవ రావుకు చెక్ పెట్టేందుకే రాజ్యసభకు నాలుగో అభ్యర్థిగా రాపోలు ఆనంద భాస్కర్‌ను ఎంపిక చేసినట్లు భావిస్తున్నారు. కేశవరావు స్వతంత్ర అభ్యర్థిగా రంగంలోకి దిగుతారనే ప్రచారం జరుగుతున్న నేపథ్యంలో అలా దిగకుండా చూడడానికి ఆయనను ఎంపిక చేసినట్లు భావిస్తున్నారు. డబ్బులు దండిగా లేని బిసి వర్గానికి చెందిన రాపోలు ఆనంద భాస్కర్‌ను ఓడించడానికే తాను స్వతంత్ర అభ్యర్థిగా రంగంలోకి దిగాననే అపవాదు వస్తుందనే ఉద్దేశంతోనే జాగ్రత్తగా పార్టీ అధిష్టానం వ్యవహరించిందని కేశవరావు భావిస్తున్నట్లు చెబుతున్నారు.

స్వతంత్ర అభ్యర్థిగా బరిలోకి దిగితే సులువుగా విజయం సాధించే వాడినని తన సన్నిహితుల వద్ద కేశవ రావు వ్యాఖ్యానించినట్లు తెలిసింది. తెలంగాణ రాష్ట్ర సమితి (తెరాస), వైయస్ జగన్ వర్గం ఎమ్మెల్యేలు, కాంగ్రెస్‌లో తనను అభిమానించే ఎమ్మెల్యేలతో పాటు టీడీపీ నుంచి కూడా ఓట్లు వేయిస్తామని ఆ పార్టీ పెద్దలు కొందరు తనకు హామీ ఇచ్చారని కేశవరావు తన సన్నిహితుల వద్ద చెప్పినట్లు సమాచారం. ఇలా మొత్తం 46 ఓట్లు తనకు పడేవని, తద్వారా తాను గెలుపొందే వాడినన్నది ఆయన అభిప్రాయమని చెబుతున్నారు. సోనియాకు తన పట్ల మంచి అభి ప్రాయమే ఉన్నదని, అయితే ముఖ్యమంత్రే తనకు రాజ్యసభ సీటు రాకుండా అడ్డుపడ్డారని కేకే అన్నట్లు తెలిసింది.

English summary

It is said that to put check K Keshav rao, congress high command has nominated Rapolu Ananda Bhaskar for Rajyasabha.