బొత్సను కుటుంబ సభ్యులే చెప్పుతో కొట్టాలి: అనురాధ

By Pratap

Published: Wednesday, December 26, 2012, 8:27 [IST]

విజయవాడ: స్థాయిని మరిచి మహిళలను కించపరిచే విధంగా వ్యాఖ్యలు చేసిన పిసిసి అధ్యక్షుడు బొత్స సత్యనారాయణను కుటుంబసభ్యులే చెప్పుతో కొట్టాలని తెలుగుదేశం పార్టీ రాష్ట్ర ప్రధాన కార్యదర్శి పంచుమర్తి అనురాధ తీవ్రస్థాయిలో మండిపడ్డారు. ఆడవాళ్ళ విలువ తెలిసినవారు ఎవరూ అలా మాట్లాడరని, కనీసం ఆయన సతీమణి అయినా ఖండించి ఉంటే సంతోషించేవారమని ఆమె అన్నారు.

బొత్స పొరపాటున ఈ వ్యాఖ్యలు చేయలేదని, తప్పుగా మాట్లాడినందువల్లే తాను ఆవేశంగా స్పందించాల్సి వచ్చిందని ఆమె అన్నారు. దేశ రాజధాని ఢిల్లీలోనే మహిళలకు రక్షణ కరువైందని, ఇక దేశంలో మహిళల పరిస్థితేమిటని ఆమె ప్రశ్నించారు.

చట్టాలలో ఉన్న లొసుగులను ఆధారంగా చేసుకుని నిందితులు సులభంగా తప్పించుకుంటున్నారని, చట్టాలను మరింత కఠినతరం చేయాల్సిన అవసరం ఉందన్నారు. స్వేచ్ఛ ఉంది కదా అని స్త్రీలు అర్థరాత్రి రోడ్డు మీద తిరుగుతారా అంటూ బొత్స సత్యనారాయణ ఢిల్లీ గ్యాంగ్ రేప్ సంఘటనపై అన్నారు. ఆ తర్వాత పొరపాటు గుర్తించి సరిదిద్దుకున్నారు.

బొత్స వ్యాఖ్యలపై తీవ్ర నిరసన వ్యక్తమైంది. తెలుగుదేశం, వైయస్సార్ కాంగ్రెసు పార్టీ నాయకులు బొత్స వ్యాఖ్యలను తీవ్రంగా నిరసించారు. వి. హనుమంతరావు వంటి కాంగ్రెసు నాయకులు కూడా బొత్స సత్యనారాయణను తప్పు పట్టారు.

Published On December 26, 2012