ఎస్సైపై దాడి, అరెస్ట్ భయం: అజ్ఞాతంలో టిడిపి ఎమ్మెల్యే!
కాగా చింతమనేని ప్రభాకర్ పైన, ఆయన గన్మెన్ పైన పోలీసులు ఎస్సీ, ఎస్టీ అట్రాసిటీ కేసును సోమవారం నమోదు చేశారు. వారితో పాటు మరో ఇద్దరి పైనా కేసు నమోదయింది. పెదవేగి ఎస్సై బండి మోహన రావు సిబ్బందితో పినకడిమి గ్రామానికి వెళ్లారు. అక్కడ పేకాట ఆడుతున్న వారిని పట్టుకున్నారు.
పేకాట ఆడుతున్న వారిని పట్టుకొని తీసుకు వెళ్తుండగా ఎమ్మెల్యే తన కారుతో తమను అడ్డగించారని, తనను చంపుతానంటూ బెదిరిస్తూ కొట్టారని ఎస్సై పోలీసు స్టేషన్లో ఫిర్యాదు చేశారు. ఎమ్మెల్యే గన్మన్, అనుచరులు శాసనసభ్యుడికి సహకరించారని ఫిర్యాదులో పేర్కొన్నారు.
ఎస్సై ఫిర్యాదు మేరకు పోలీసులు కేసు నమోదు చేసుకొని ఆయనను అరెస్టు చేయాలని భావించారు. గన్మన్, మరో ఇద్దరిని అదుపులోకి తీసుకున్నారు. ఎమ్మెల్యే కోర్టులో లొంగిపోతారన్న సమాచారంతో సోమవారం ఆ పరిసరాల్లో మోహరించిన పోలీసులు ఆయన రాకపోవడంతో వెనుదిరిగారు. ఈ రోజు ఆయన కోసం గాలిస్తున్నారు.