చివరిదాకా పోరాటం: శైలజానాథ్, ఫస్ట్ వ్యక్తిని నేను: జెసి

By Srinivas

Published: Friday, July 26, 2013, 14:30 [IST]

న్యూఢిల్లీ: రాష్ట్రాన్ని సమైక్యంగా ఉంచేందుకు తాము చివరి వరకు పోరాటం చేస్తామని, ఎలాంటి త్యాగాలకైనా సిద్ధమని, టిడిపి వైఖరి దుర్మార్గమని సీమాంధ్ర మంత్రులు శుక్రవారం న్యూఢిల్లీలో విలేకరులతో మాట్లాడుతూ చెప్పారు. ఎపి భవన్లో భేటీ అనంతరం మంత్రి శైలజానాథ్ తదితరులు మాట్లాడారు. సమైక్యాంధ్రకు మద్దతుగా రాజీనామాలు చేసిన వైయస్సార్ కాంగ్రెసు పార్టీ నేతల చిత్తశుద్దిపై తాము మాట్లాడమని అయితే, వారు మొదట తమ పార్టీ అధిష్టానంపై ఒత్తిడి తీసుకు రావాలని సూచించారు.

రాష్ట్రాన్ని సమైక్యంగా ఉంచేందుకు అన్ని అవకాశాలను ఉపయోగించుకుంటామన్నారు. మంత్రులు, పార్లమెంటు సభ్యులు సమైక్యానికి కట్టుబడి ఉన్నారన్నారు. ఊహాగాన వార్తలను తాము పట్టించుకోమన్నారు. రాష్ట్రం సమైక్యంగానే ఉంటుందని వారు విశ్వాసం వ్యక్తం చేశారు. కేంద్రమంత్రులు కావూరి సాంబశివ రావు, పురంధేశ్వరి తదితరులు సమైక్యవాదానికే కట్టుబడి ఉన్నారన్నారు.

ప్రజాస్వామ్యంలోని అన్ని అవకాశాలను సమైక్యం కోసం ఉపయోగించుకుంటామన్నారు. తెలుగుదేశం పార్టీ అధ్యక్షుడు నారా చంద్రబాబు నాయుడుది సమైక్యవాదానికి భిన్నమైన వైఖరి అని, అది దుర్మార్గమన్నారు. సీమాంధ్రలో మోహరిస్తున్న బలగాల గురించి తమకు ఏమీ సమాచారం లేదన్నారు. రాష్ట్రాన్ని విభజిస్తే రెండు రాష్ట్రాలకు నష్టమే అన్నారు. ఏది ఏమైనా పార్టీని వీడమని, అయితే త్యాగాలకు మాత్రం సిద్ధంగా ఉన్నామన్నారు. రాష్ట్రాన్ని సమైక్యంగా ఉంచేందుకు తాము కలవని కేంద్ర నేతలు లేరన్నారు.

అనివార్యమైతే...: జెసి

విభజన అనివార్యమైతే తాను తెలంగాణతో ఉండేందుకు ఇష్టపడతామని కాంగ్రెసు పార్టీ సీనియర్ నేత, మాజీ మంత్రి జెసి దివాకర్ రెడ్డి శుక్రవారం అన్నారు. తాను వ్యక్తిగతంగా సమైక్యవాదిని అన్నారు. రాజీనామాలు తొందరపాటు అన్నారు. రాజీనామాలు చేసినా తమ పార్టీ నేతలు అధిష్టానం నిర్ణయానికి కట్టుబడి ఉంటారన్నారు. రాష్ట్రం సమైక్యంగా ఉండాలనుకునే వారిలో తాను మొదటి వ్యక్తిని అని చెప్పారు. విభజిస్తే రాయల తెలంగాణ ఇవ్వాలన్నారు.

Published On July 26, 2013