చంద్రబాబుతో పోలిస్తే నితీష్..ఏపీ స్పీకర్ షాకింగ్..!

కేంద్రంలో ఈసారి ఎన్డీయే ప్రభుత్వ ఏర్పాటులో టీడీపీ అధినేత చంద్రబాబుతో పాటు జేడీయూ అధినేత, బీహార్ సీఎం నితీష్ కుమార్ కీలక పాత్ర పోషించారు. వీరిద్దరూ లేకపోతే కేంద్రంలో ఎన్డీయే మైనార్టీ ప్రభుత్వాన్ని ఏర్పాటు చేయాల్సి వచ్చేది. ఎన్డీయే అధికారంలోకి వచ్చాక కూడా మోడీ వీరిద్దరి విషయంలో పాజిటివ్ గా నిర్ణయాలు తీసుకుంటున్నారు. అందుకే ఏపీ, బీహార్ కు ప్రతీ విషయంలోనూ నిధుల సాయం లభిస్తోంది. అలాగే చంద్రబాబు, నితీష్ కూడా పాత మిత్రులే.

అయితే తాజాగా ఓ విషయంలో ఏపీ అసెంబ్లీ స్పీకర్ చింతకాయల అయన్నపాత్రుడు అనూహ్యంగా వీరిద్దరి మధ్య పోలిక తెచ్చారు. ఓ కీలక విషయంలో వీరిద్దరినీ పోల్చిన అయ్యన్న.. ఇందులో చంద్రబాబే గొప్ప అన్నారు. అయితే టీడీపీ ఎమ్మెల్యే అయిన అయన్నపాత్రుడు ఇలా చంద్రబాబును పొగడటంలో తప్పులేదు కానీ నితీష్ కుమార్ తో పోలిక తీసుకురావడమే ఇక్కడ చర్చనీయాంశమైంది. ఇలా అయ్యన్న వీరిద్దరినీ పోల్చిన విషయం ఏంటో తెలుసా అసరా పెన్షన్లు.

నిన్న రిపబ్లిక్ డే సందర్బంగా జెండా ఆవిష్కరణ తర్వాత చేసిన ప్రసంగంలో అసెంబ్లీ స్పీకర్ అయ్యన్నపాత్రుడు కీలక వ్యాఖ్యలు చేశారు. తాజాగా తాను స్పీకర్ల సదస్సు కోసం బీహార్ వెళ్లానని, అక్కడ కేవలం 400 మాత్రమే పెన్షన్ ఇస్తున్నారని, కానీ చంద్రబాబు మాత్రం వృద్ధులకు 4 వేలు, దివ్యాంగులకు 6 వేలు పెన్షన్ ఇస్తున్నారని గుర్తుచేశారు.

పేదల కోసం చంద్రబాబు ఉదారంగా అమలు చేస్తున్న ఈ పథకాలపై అందరూ ఆలోచించి ప్రభుత్వానికి చేయూత ఇవ్వాలని అయ్యన్న కోరారు. తద్వారా చంద్రబాబుపై తన అభిమానాన్ని చాటుకున్నారు. కానీ పరోక్షంగా నితీష్ తో పోలిస్తే చంద్రబాబు ఉదారంగా ఉన్నారని గుర్తుచేశారు.

English summary

ap assembly speaker chintakayala ayyannapatrudu took a dig at key nda partner to Chandrababu and bihar cm nitish kumar by comparing old age pensions giving in both states.