చలి ఎఫెక్ట్‌తో అరకులోయ గజగజ... 3.6 డిగ్రీల ఉష్ణోగ్రత !!

అరకు లోయలో ఈ సీజన్‌లో చలి తీవ్రత రికార్డు స్థాయికి చేరుకుంది. సాధారణంగా ప్రతి సంవత్సరం చలి కనిష్ట ఉష్ణోగ్రతలకు పడిపోవడం సాధారణమే. కానీ ఈసారి మాత్రం గతంలో ఎప్పుడూ లేనంతగా ఉష్ణోగ్రతలు పడిపోవడంతో ప్రాంతమంతా గజగజలాడిపోతోంది. ఉదయం పది గంటల వరకు పొగ మంచు కమ్ముకోవడం.. ఒకింత గడ్డకట్టించే చల్లటి గాలులు వీచడం స్థానికులను తీవ్ర ఇబ్బందుల్లోకి నెడుతున్నాయి.

అత్యల్ప ఉష్ణోగ్రతలతో అరకులోయ..

అల్లూరి సీతారామరాజు జిల్లాలోని అరకులోయలో కనిష్టంగా 3.6 డిగ్రీల సెల్సియస్ నమోదు కావడం చలితీవ్రత ఎంత పెరిగిందో తెలియజేస్తోంది. డుంబ్రిగుడలో 3.9°, జి.మాడుగులలో 3.9°, పాడేరు, ముంచిగ్ పుట్టు, హుకుంపేటలో 5° లోపే ఉష్ణోగ్రతలు నమోదవుతున్నాయి. ఈ సంఖ్యలు గిరిజన ప్రాంతాల్లో జీవనాన్ని పూర్తిగా స్తంభింపజేశాయి. పగలు-రాత్రి అనే తేడా లేకుండా ఎప్పటికప్పుడు వణికించే గాలులు వీచడంతో జనజీవనం భారీగా దెబ్బతింటోంది.

ఇక దట్టమైన పొగమంచుతో రవాణాకు అంతరాయం ఏర్పడుతోంది. ఉదయం నుంచి పది గంటల వరకు అరకులోయలో అతి దట్టమైన పొగ మంచు కమ్ముకుని ఉంటుంది. రహదారులపై దాదాపు కనపడకపోవడంతో వాహనదారులు పగటి పూట కూడా లైట్లు వేసుకొని ప్రయాణిస్తున్నారు. ప్రాంతీయ బస్సులు, జీపులు ఆలస్యంగా నడవడంతో ఉద్యోగులు, విద్యార్థులు ఇబ్బందులు పడుతున్నారు. వాతావరణ శాఖ అంచనా ప్రకారం అల్లూరి జిల్లాలో చలి తీవ్రత ఇంకా కొంతకాలం కొనసాగే అవకాశం ఉంది. రాత్రి, తెల్లవారు జామున ఉష్ణోగ్రతలు మరింత తగ్గే అవకాశం ఉందని అధికారులు హెచ్చరిస్తున్నారు. స్థానికులు తప్పనిసరి పరిస్థితుల్లో తప్ప బయటకు రాకూడదని, చలికి రక్షణ కలిగించే దుస్తులు తప్పక ధరిచాల్సిందేనని సూచిస్తున్నారు.

ఈ చలి ప్రభావం ముఖ్యంగా గిరిజనులకు ఇబ్బందిగా మారింది. పొలాల్లో పనులు చేయడానికి కూడా వీలుపడడం లేదని వాపోతున్నారు. ఉదయం, సాయంత్రం సమయంలో శరీరం మొత్తం గడ్డకట్టుకునే స్థాయిలో చలి ఉండడంతో వాళ్లు చలి మంటలు, పొగ కమ్మిన గొట్టెల వద్దే ఎక్కువ సమయం గడుపుతున్నారు. పెద్దలు, చిన్నారులు ఎక్కువగా జలుబు, దగ్గు, జ్వరం సమస్యలను ఎదుర్కొంటున్నారు. గిరిజన రైతులు "ఇలాంటి చలిని మా జీవితంలో ఎప్పుడూ చూడలేదు" అని చెబుతున్నారు.

మరోవైపు అరకులోయలో చలితీవ్రత కారణంగా ఉన్ని దుస్తుల వ్యాపారం ఊపందుకుంది. మార్కెట్లలో ఉన్ని స్వెటర్లు, షాల్లు, గ్లౌజులు, మంకీ క్యాప్‌ల డిమాండ్ భారీగా పెరిగింది. రాత్రివేళ అరకులోయ మొత్తం చలి మంటల వెలుగులో దర్శనమిచ్చే దృశ్యంగా కనిపిస్తోంది. చలితో స్థానికులు ఇబ్బందులు పడుతున్నా, పర్యాటకులకు మాత్రం ఇది ప్రత్యేక అనుభవంగా మారింది. కానీ వణికించే వాతావరణం, పొగమంచుతో కప్పుకుపోయిన లోయ సౌందర్యం వారిని ఆకర్షిస్తోంది. దీంతో హోటల్, రిసార్ట్‌ల వద్ద బోన్ఫైర్లు, హాట్ బేవరేజెస్‌కు భారీ డిమాండ్ ఉంది.

English summary

The Araku Valley has experienced record cold temperatures this season. It is normal for temperatures to drop to record lows every year.