మంత్రులపై చంద్రబాబు తాజా ఫీడ్ బ్యాక్..! అసంతృప్తి ఎక్కడంటే?

ఏపీలో కూటమి ప్రభుత్వం అధికారంలోకి వచ్చి ఏడాదిన్నర అయింది. ఈ 18 నెలల కాలంలో ప్రభుత్వం ఎన్నో సంక్షేమ పథకాలు, అభివృద్ధి కార్యక్రమాలు చేపట్టింది. అయితే వాటిని ప్రజల్లోకి తీసుకెళ్లి ప్రభుత్వానికి మంచి పేరు తీసుకురావడంలో మంత్రులు విఫలమవుతున్నారన్న విమర్శలు ఎప్పటి నుంచో ఉన్నాయి. ఈ నేపథ్యంలో సీఎం చంద్రబాబు స్వయంగా పలుమార్లు కేబినెట్ భేటీల్లో మంత్రులకు క్లాస్ తీసుకుంటూనే ఉన్నారు. అయినా పరిస్ధితిలో మార్పు రావడం లేదని తెలుస్తోంది.

రాష్ట్రంలో కేబినెట్ మంత్రులపై ఇవాళ అమరావతిలో జరుగుతున్న హెచ్ఓడీల భేటీలో సీఎం చంద్రబాబు అసంతృప్తి వ్యక్తం చేశారు. ఇవాళ భేటీలో మంత్రుల పనితీరుపై ప్రస్తావన వచ్చింది. దీనిపై స్పందించిన చంద్రబాబు.. మంత్రుల పనితీరులో ఎలాంటి మార్పు లేదని తేల్చేశారు. చాలా మందికి తమ శాఖల్లో ఏం జరుగుతుందో తెలియడం లేదని సీఎం తెలిపారు. అలాగే మంత్రులు కేంద్ర నిధులు తేవడం, వినియోగంలోనూ విఫలమయ్యారని చంద్రబాబు వెల్లడించారు.

కేంద్ర నిధులు తీసుకొచ్చేందుకు, వాటి కోసం చేసే లాబీయింగ్ కోసం మంత్రులు ఒక్కరోజు ఢిల్లీకి వెళ్లడంలో నష్టం లేదని సీఎం చంద్రబాబు తెలిపారు. ఇకనైనా మంత్రులు పనితీరు మార్చుకోవాలని చంద్రబాబు వారికి సూచించారు. ఇప్పటికే పలుమార్లు ఇవే అంశాలపై చంద్రబాబు మంత్రులకు కేబినెట్ భేటీల్లో క్లాస్ లు తీసుకుంటూనే ఉన్నారు. ముఖ్యంగా తమ శాఖలపై మంత్రులు పట్టు పెంచుకోవాలని గతంలో ఎప్పటి నుంచో కోరుతున్నారు. అయితే మంత్రులు చంద్రబాబు వ్యాఖ్యల్ని ఇప్పటికీ పట్టించుకోవడం లేదని తాజా పరిణామాలు స్పష్టం చేస్తున్నాయి.