చిత్తూరులో షాకింగ్ ప్రమాదం: పాడె మోస్తూ ముగ్గురు మృతి!!

ఇప్పుడు బాగా మాట్లాడిన వాళ్ళు కొద్దిసేపటికే ప్రాణాలు కోల్పోతున్నారు. మరణం ఎప్పుడు ఎవరిని ఎలా పలకరిస్తుందో అర్థం కాని పరిస్థితి నెలకొంది. చిన్న చిన్న వయసు వాళ్ళు కూడా రక రకాల అనారోగ్య సమస్యలతో తిరిగిరాని లోకాలకు వెళ్లిపోతున్నారు. ముఖ్యంగా గుండెపోటు వచ్చి మృతి చెందుతున్న వారి సంఖ్య అయితే గణనీయంగా పెరుగుతుంది.

తాజాగా చిత్తూరు జిల్లాలో ఘోర విషాద ఘటన చోటు చేసుకుంది. ఒక చనిపోయిన మహిళ అంత్యక్రియలు నిర్వహించడానికి వచ్చిన వారు ఊహించని విధంగా ప్రాణాలు కోల్పోయారు. శవాన్ని మోసుకుంటూ స్మశానం వైపు .వెళ్తుండగా పాడె మోసుకుంటూ వెళ్తున్న వారికి విద్యుత్ తీగల రూపంలో మరణం ఎదురైంది. విద్యుత్ తీగలు తగిలి ముగ్గురు మృతి చెందిన ఘటన మరింత విషాదాన్ని నింపింది.

ఈ ఘటనలో మరో ముగ్గురికి గాయాలు కాగా, గాయపడిన వారిని ఆసుపత్రికి తరలించారు. ఇక ఈ ఘటన వివరాల్లోకి వెళితే తంబగాని పల్లెకు చెందిన రాణి అనే మహిళ అనారోగ్యంతో మృతి చెందారు. ఆమె మృతదేహాన్ని స్మశానానికి తీసుకు వెళ్ళే సమయంలో కరెంటు స్తంభం నుంచి వేలాడుతున్న విద్యుత్ తీగలు పాడెకు తగలడంతో మృతదేహాన్ని మోస్తున్న ముగ్గురు అక్కడికక్కడే మృతి చెందారు.

మృతులను తిరుపతి, రవీంద్రన్, మునప్పగా గుర్తించారు. ఈ ఘటనపై పోలీసులు కేసు నమోదుచేసి దర్యాప్తు చేస్తున్నారు. వారి మృతదేహాలను పోస్టుమార్టం నిమిత్తం కుప్పం లోని ప్రభుత్వ ఆసుపత్రికి తరలించారు. చనిపోయిన మహిళ పాడె మోసి, వీరు చివరికి పాడె ఎక్కాల్సిన పరిస్థితి వచ్చిందని వారి కుటుంబ సభ్యులు కన్నీరు మున్నీరుగా విలపిస్తున్నారు. ఊహించని విషాద ఘటనతో చిత్తూరు జిల్లా తంబగాని పల్లెలో అందరూ కన్నీరు మున్నీరయ్యారు.

English summary

A tragic incident took place in Chittoor district. Three people who had come to perform the last rites of a dead woman unexpectedly lost their lives while carrying a hearse.