మంచు పట్టిన ఏపీ.. ఇవాళ భారీ వర్షాలు! బంగాళాఖాతంలో దట్టంగా అల్పపీడనం..
భారత భూభాగాన్ని ప్రస్తుతం రకరకాల వాతావరణ మార్పులు ఒకేసారి పలకరిస్తున్నాయి. ఒకవైపు అర్నాబ్ తుఫాను ప్రభావం పూర్తిగా తగ్గకముందే, మరోవైపు సముద్రంలో కొత్త అలజడి మొదలైంది. దేశంలోని మధ్య, తూర్పు, దక్షిణ రాష్ట్రాల్లో శనివారం భారీగా వర్షాలు కురిసే అవకాశం ఉందని వాతావరణ శాఖ సంకేతాలు ఇచ్చింది. ఆకాశంలో మేఘాల రాకపోకలు పెరగడం, గాలుల దిశ మారడంతో వాతావరణంలో ఒక్కసారిగా ఉష్ణోగ్రతలు పడిపోయి చల్లటి గాలులు వీస్తున్నాయి. సామాన్యుల నుంచి రైతన్నల వరకు అందరూ ఇప్పుడు రాబోయే రెండు రోజుల వాతావరణంపైనే దృష్టి సారించారు.
రెండ్రోజుల రోజుల క్రితం తీవ్ర తుఫానుగా విరుచుకుపడిన 'అర్నాబ్' క్రమంగా బలహీనపడినప్పటికీ, దాని శేషాలు ఇంకా దేశంలోని మధ్య భాగంలో చురుగ్గా ఉన్నాయి. ఛత్తీస్‌గఢ్, ఒడిశా సరిహద్దుల్లో కేంద్రీకృతమైన ఈ గాలి బంధం మరింత క్షీణించి తూర్పు మధ్యప్రదేశ్‌ వైపు కదిలింది. ఇది బలహీనపడుతున్న వేళ, దీనికి అనుబంధంగా ఏర్పడిన గాలుల ఉపరితల ఆవర్తనం వల్ల మధ్య భారత్‌తో పాటు తూర్పు రాష్ట్రాల్లో ఆకాశం మబ్బుపట్టి పలుచోట్ల జల్లుల నుంచి మోస్తరు వర్షాలు పడుతున్నాయి.
బంగాళాఖాతంలో దట్టంగా అల్పపీడనం.. ఏపీ వైపు పయనం!
అయితే అసలైన ముప్పు ఇప్పుడు ఆండమాన్ సముద్రంలో పొంచి ఉంది. దక్షిణ అండమాన్ పరిసర ప్రాంతాల్లో ఒక కొత్త అల్పపీడనం బలంగా రూపుదిద్దుకుంది. ఇది పశ్చిమ-వాయువ్య దిశగా వేగంగా పయనిస్తూ నేడు వాయుగుండంగా బలపడనుంది. ఈ కొత్త వాతావరణ వ్యవస్థ రాబోయే రెండు రోజుల్లో మరింత బలపడి నేరుగా ఆంధ్రప్రదేశ్ తీరం వైపు దూసుకొచ్చే అవకాశాలు ఉన్నాయని అధికారులు హెచ్చరిస్తున్నారు. దీని ప్రభావంతో రాబోయే రోజుల్లో ఏపీ సహా పొరుగు రాష్ట్రాల తీర ప్రాంతాల్లో భారీ వర్షాలు కురిసే అవకాశముంది.
దేశవ్యాప్తంగా వాతావరణ చక్రబంధం!
ఒక్క అల్పపీడనం మాత్రమే కాకుండా, దేశంలోని వేర్వేరు మూలల్లో అనేక వాతావరణ మార్పులు ఒకేసారి చోటుచేసుకున్నాయి. ఉత్తర పంజాబ్, దక్షిణ గుజరాత్, అసోం ప్రాంతాల్లో వేర్వేరుగా ఉపరితల ఆవర్తనాలు ఏర్పడ్డాయి. అటు అరేబియా సముద్రం నుంచి మధ్య భారత్ వరకు సుదీర్ఘమైన ద్రోణి విస్తరించి ఉంది. ఈ అన్ని వ్యవస్థలు ఒకే సమయంలో ప్రభావం చూపుతుండటంతో దేశంలోని మెజారిటీ ప్రాంతాల్లో వర్షాలకు అనుకూలమైన పరిస్థితులు ఏర్పడ్డాయి.
రాబోయే 48 గంటలు అత్యంత కీలకం!
ప్రస్తుతం ఆండమాన్ పరిసరాల్లో రూపుదిద్దుకున్న వాయుగుండం ఏ తీరానికి చేరువవుతుంది? ఎంత తీవ్రతను సంతరించుకుంటుంది? అన్నదే ఇప్పుడు అధికారుల ముందున్న ప్రధాన ప్రశ్న. రాబోయే 48 గంటల్లో ఈ వ్యవస్థ తీవ్రతపై స్పష్టత రానుంది. ఆంధ్రప్రదేశ్ తీరప్రాంత ప్రజలు, ముఖ్యంగా మత్స్యకారులు సముద్ర వేటకు వెళ్లే సమయంలో తగిన జాగ్రత్తలు తీసుకోవాలని, ఎప్పటికప్పుడు వాతావరణ బులెటిన్లను గమనిస్తూ ఉండాలని అధికారులు సూచిస్తున్నారు.
మంచు పట్టిన ఏపీ..
తుఫాను, అల్పపీడనం ప్రభావంతో ఏపీలో వాతావరణం ఒక్కసారిగా మారిపోయింది. అక్టోబర్ చివరి వారం ప్రారంభం వరకు ఎండలతో మండిపోయిన రాష్ట్రం అర్నాబ్ తుఫాను ధాటికి వణికిపోయింది. తాజాగా అక్టోబర్ నెల చివరి రోజు చలికాలం ప్రారంభం వేళ ఏపీలో పలు ప్రాంతాల్లో మంచు పట్టింది. ఈ ఏడాదిలో ఇంత వేకువ జామునే పొగమంచు కప్పేయడం ఇదే తొలిసారి కావడం విశేషం. ఉదయం నాలుగున్నర నుంచే మంచు ప్రభావం రోడ్లపై స్పష్టంగా కనిపించింది.
Click it and Unblock the Notifications
Sign in with Google
