పెళ్లికి పెద్దలు అంగీకరించలేదని ప్రేమజంట ఆత్మహత్య

ఆదిలాబాద్: ఆదిలాబాదు జిల్లాలో విషాద సంఘటన చోటు చేసుకుంది. జిల్లాలోని నెన్నెలలో ఓ ప్రేమ జంట బావిలో దూకి ఆత్మహత్య చేసుకుది. ఈ సంఘటన ఆలస్యంగా వెలుగులోకి వచ్చింది. నెన్నెల గ్రామానికి చెందిన స్రవంతి, తిరుపతి చాలా కాలంగా ప్రేమించుకుంటున్నారు. పెళ్లి చేసుకోవాలని నిర్ణయించుకున్నారు.

పెళ్లి చేసుకుంటామని ఇరు కుటుంబాల పెద్దలకు వారు చెప్పారు. అయితే ఇరు కుటుంబాల పెద్దలు కూడా వారిపై తీవ్ర ఆగ్రహం వ్యక్తం చేసి, పెళ్లికి నిరాకరించారు. దాంతో పది రోజుల నుంచి ప్రేయసిప్రియులిద్దరు కనిపించకుండా పోయారు.

వారిద్దరు కలిసి పరారయ్యారని ఇరు కుటుంబాలవారు కూడా అనుకున్నారు. అయితే శనివారంనాడు ప్రేయసీప్రియులు బావిలో శవాలై తేలారు. పెళ్లికి అంగీకరించకపోవడంతో మనస్తాపానికి గురై వారు ఆత్మహత్య చేసుకున్నట్లు భావిస్తున్నారు.

మృతదేహాలను పోలీసులు స్వాధీనం చేసుకుని పోస్టుమార్టం నిమిత్తం ఆస్పత్రికి తరలించారు. కేసు నమోదు చేసుకుని దర్యాప్తు చేస్తున్నారు.

English summary

Lovers commit suicide in Adilabad district, as eleders rejected for their marraige.