కేంద్ర ఎన్నికల కమిషనర్ రాజీనామాపై అనుమానాలు లేవనెత్తిన సీబీఐ మాజీ జేడీ

Arun Goel: దేశంలో సార్వత్రిక ఎన్నికల కోలాహలం నెలకొంది. షెడ్యూల్ విడుదలకు ఎంతో సమయం లేదు. గడువు సమీపించింది. ఈ నెల 13 లేదా 14 తేదీల్లో షెడ్యూల్ విడుదల కావడం ఖాయంగా కనిపిస్తోంది. దీనితో పాటే- దేశవ్యాప్తంగా ఎన్నికల ప్రవర్తన నియమావళి అమలులోకి వస్తుంది.

దీనికి సంబంధించిన ఏర్పాట్లన్నింటినీ కూడా కేంద్ర ఎన్నికల కమిషన్ కార్యాలయం యుద్ధ ప్రాతిపదికన పూర్తి చేస్తోంది. లోక్‌సభతో పాటు ఏపీ, ఒడిశా, అరుణాచల్ ప్రదేశ్, సిక్కింలల్లో అసెంబ్లీ ఎన్నికలు జరుగనున్నాయి. ఏపీలో వైఎస్ఆర్ కాంగ్రెస్ పార్టీ, ఒడిశాలో బిజూ జనతాదళ్, అరుణాచల్ ప్రదేశ్‌లో భారతీయ జనతా పార్టీ, సిక్కింలో సిక్కిం క్రాంతికారి మోర్చా- బీజేపీ సంకీర్ణ కూటమి అధికారంలో ఉన్న విషయం తెలిసిందే.

2019 తరహాలోనే దేశవ్యాప్తంగా మొత్తం ఏడు దశల్లో పోలింగ్ పూర్తి అయ్యేలా కేంద్ర ఎన్నికల కమిషన్ అధికారులు షెడ్యూల్‌ను రూపొందించినట్లు చెబుతున్నారు. ఏప్రిల్ రెండోవారంలో తొలి దశ పోలింగ్ ఉండొచ్చు. మే 18 లేదా 20వ తేదీ నాటికి పోలింగ్ ప్రక్రియ మొత్తం పూర్తి అవుతుంది. అదే నెల చివరి వారం నాటికి కేంద్రంలో కొత్త ప్రభుత్వం ఏర్పాటు కావడం ఖాయంగా కనిపిస్తోంది.

ఈ పరిస్థితుల్లో అనూహ్యం సంఘటన చోటు చేసుకుంది. కేంద్ర ఎన్నికల కమిషనర్ అరుణ్ గోయెల్ తన పదవికి రాజీనామా చేశారు. తన రాజీనామా పత్రాన్ని రాష్ట్రపతి ద్రౌపది ముర్ము ఆమోదం కోసం పంపించారు. దీన్ని రాష్ట్రపతి ఆమోదించారు. ఈ మేరకు రాష్ట్రపతి భవన్ ఓ నోటిఫికేషన్ జారీ చేసింది.

ఈ విషయాన్ని కేంద్ర న్యాయ మంత్రిత్వ శాఖ కూడా ధృవీకరించింది. అరుణ్ గోయెల్ రాజీనామా.. తక్షణమే అమలవుతుందని తెలిపింది. ఎన్నికల షెడ్యూల్ విడుదల గడువు సమీపించిన ప్రస్తుత పరిస్థితుల్లో అరుణ్ గోయెల్.. తప్పు కోవడం కలకలం రేపుతోంది. దేశవ్యాప్తంగా ఈ అంశం చర్చనీయాంశమౌతోంది.

నిజానికి ఆయన పదవీ కాలం మరో మూడేళ్ల వరకు ఉంది. 2027 వరకు ఆయన ఎన్నికల కమిషనర్‌గా కొనసాగాల్సి ఉంది. మూడేళ్ల కాల వ్యవధి మిగిలివుండటం, లోక్‌సభ ఎన్నికల షెడ్యూల్ విడుదల గడువు అత్యంత సమీపానికి వచ్చిన సమయంలో అరుణ్ గోయెల్ రాజీనామా చేయడం ప్రాధాన్యతను సంతరించుకుంది.

దీనిపై ఎన్నికల సీబీఐ మాజీ జాయింట్ డైరెక్టర్ వీవీ లక్ష్మీనారాయణ స్పందించారు. ఈ కీలక సమయంలో అరుణ్ గోయెల్ రాజీనామా చేయడం అత్యంత మిస్టీరియస్‌గా మారిందని వ్యాఖ్యానించారు. దీనికి గల కారణాలను దేశ ప్రజలు తెలుసుకోవాలనుకుంటున్నారని చెప్పారు. తన రాజీనామా వెనుక గల కారణాలను వివరించాల్సిన నైతిక బాధ్యత ఆయనపై ఉందని అన్నారు.

English summary

Former CBI Joint Director VV Lakshminarayana said that the resignation of Election Commissioner Arun Goel at this crucial juncture appears very mysterious.