అమరావతి ఇన్విటేషన్‌లో మ్యాప్, నాలుగు గ్రూప్‌లుగా పాస్‌లు: అమరావతికి కలశాలు

అమరావతి: ఏపీ రాజధాని అమరావతి శంకుస్థాపన ఆహ్వాన పత్రికలు అతిథులకు మార్గ సూచికలుగా రూపొందించారు. సోమవారం నాటికి 4.08 లక్షల ఆహ్వాన పత్రికల పంపిణీ జరిగింది. వీటిని నాలుగు తరగతులుగా విభజించారు.

రైతులు, సామాన్యులకు ఆహ్వాన పత్రికలు అందాయి. ఇతర రంగాలకు చెందిన వారిని ఏఏఏ - ఎంఐపీలు, ఏఏ - వీవీఐపీలు, ఏ -వీఐపీలుగా గుర్తించింది. వీరికి ఎరుపు, నీలం రంగులతో కూడిన వాహనాల పాస్, సభా ప్రాంగణంలోకి ప్రవేశానికి పాస్, రూట్ మ్యాప్‌లను ఆహ్వాన పత్రికలో అందించింది.

ప్రదాని నరేంద్ర మోడీ నుంచి ముఖ్యమంత్రులు, గవర్నర్లు, కేంద్ర, రాష్ట్రాలలకు చెందిన వారిని ఒక తరగతిగా పరిగణించింది. ప్రభుత్వంతో సంబంధం ఉన్న వారందరినీ మూడు తరగతులుగా విభజించింది. ఏఏఏ, ఏఏ, ఏ తరగతి పాస్‌లు ఇచ్చింది.

ఇతర రంగాలకు చెందిన వారిని మూడు తరగతులుగా... ఏఏఏ, ఏఏ, ఏగా విభజించి నీలం రంగు పాస్‌లు అందించింది. మూడు తరగతులకు చెందిన ఆహ్వాన పత్రికలకు క్యూ ఆర్ (క్విక్ రెస్పాన్స్) కోడ్ నెంబర్ ఉంది. హోలోగ్రాంను స్కాన్ చేయగానే అది ప్రభుత్వం జారీ చేసిన ఆహ్వాన పత్రికా, నకిలిదా తేలుతుంది. వెహికిల్ పాస్, వేదిక పాస్ సరైనదా, కాదా తెలిసిపోతుంది.

మన నీరు మన మట్టికి స్పందన

అమరావతి నిర్మాణానికి 22న శంకుస్థాపన సందర్భంగా రాష్ట్ర ప్రజలందరినీ భాగస్వాములు చేయాలనే తలంపుతో సిఎం చంద్రబాబు ఇచ్చిన మన నీరు -మన మట్టి పిలుపుకు రాష్ట్రం నలుమూలల నుంచే కాకుండా దేశ విదేశాల నుంచీ అనూహ్య స్పందన లభించింది. విదేశాల నుంచి కలశాలు వచ్చాయి.

రాష్ట్రంలోని 150 శాసనసభా నియోజకవర్గాల నుంచి కలశాలతో కూడిన 150 భారీ వాహనాలు ఒకదానివెంట ఒకటిగా మంగళవారం ఆచార్య నాగార్జున యూనివర్సిటీ సమీపంలోని చంద్రబాబు సిఎంగా ప్రమాణ స్వీకారం చేసిన ప్రదేశానికి చేరుకుంటాయి.

టిడిపి ఎంపీలు, 19 రాష్ట్రాల నుంచి సేకరించిన కలశాలు 19 వాహనాల్లో సోమవారం రాత్రి విజయవాడ నగరానికి చేరుకున్నాయి. వీటిని స్వరాజ్య మైదాన్‌లో చంద్రబాబు పరిశీలించారు. వాహనాలన్నీ మంగళవారం నేరుగా అమరావతికి బయల్దేరనున్నాయి.

కేంద్ర మంత్రులు అశోక్‌గజపతిరాజు, సుజనా చౌదరి జెండా ఊపి వాహనాలను తరలిస్తారు. విజయవాడ ఎంపి కేశినేని నాని ఆధ్వర్యంలో భారీఎత్తున వాహన ర్యాలీ జరుగబోతోంది. రాష్ట్రంలోని 16వేల గ్రామాలు, వార్డుల నుంచి సేకరించిన పవిత్రమైన మట్టి, నీరుకు మూడురోజులు ఆయా ప్రాంతాల్లోని ప్రార్థనా మందిరాల్లో ప్రత్యేక ప్రార్థనలతో పూజించారు.

English summary

Route Map on Invitation card for Amaravati foundation ceremony.