Hanuma Vihari: హనుమ విహారికి నారా లోకేష్ బంపర్ ఆఫర్..! రెండే నెలల్లో..

ఆంధ్రా క్రికెట్ జట్టు కెప్టెన్ హనుమ విహారి అవమానకర పరిస్ధితుల్లో జట్టును, కెప్టెన్సీని వీడటం ఇప్పుడు రాజకీయ రంగు పులుముకుంటోంది. తిరుపతి వైసీపీ కార్పోరేటర్ కుమారుడైన పృధ్వీరాజ్ ను దూషించాడన్న కారణంతో బలవంతంగా విహారితో రాజీనామా చేయించిన వ్యవహారంలో ఇప్పుడు విహారికి మద్దతు పెరుగుతోంది. ఇప్పటికే ఆంధ్రా జట్టులో ఆటగాళ్లంతా విహారినే తమకు కెప్టెన్ గా ఉండాలంటూ మద్దతుగా ఏసీఏకు లేఖ రాయగా.. ఇప్పుడు టీడీపీ యువ నేత నారా లోకేష్ విహారికి మరో ఆఫర్ ఇచ్చాడు.

అధికార పార్టీ రాజకీయ జోక్యం కారణంగా ప్రముఖ క్రికెటర్ హనుమ విహారి అవమానకర నిష్కృమణ తనకు ఆశ్చర్యం కలిగించిందంటూ నారా లోకేష్ ఇవాళ ఎక్స్ లో పోస్టు పెట్టారు. ఆంధ్రా క్రికెట్ కు తిరిగి విహారిని ఆహ్వానిస్తున్నానంటూ లోకేష్ పేర్కొన్నారు. రెండు నెలల వ్యవధిలో ఆంధ్రప్రదేశ్ తరఫున ఆడేందుకు తిరిగి రావాలని కోరారు. తాము అతనికి, జట్టుకు రెడ్ కార్పెట్ పరుస్తామని లోకేష్ హామీ ఇచ్చారు. అలాగే వచ్చేసారి రంజీ ట్రోఫీని గెలవడానికి అవసరమైన ప్రతి సహాయాన్ని అందిస్తామని ఆఫర్ చేశారు.

I am appalled at the bitter exit of celebrated cricketer @Hanumavihari from Andhra Cricket due to the ruling party's political interference. I invite @Hanumavihari to come back to play for Andhra Pradesh in two months’ time. We'll roll out the red carpet for him and the team, and…

— Lokesh Nara (@naralokesh) February 27, 2024

రెండు నెలల్లో జరిగే ఎన్నికల తర్వాత టీడీపీ ప్రభుత్వం ఏర్పడుతుందని, అప్పుడు విహారిని తిరిగి ఆంధ్రా క్రికెట్ జట్టుకు ఆహ్వానించి తిరిగి యథాస్ధానం అప్పగించి వచ్చే సారి రంజీ ట్రోఫీ గెలిచేందుకు సాయం చేస్తామని లోకేష్ ఇచ్చిన ఆఫర్ ఇప్పుడు చర్చనీయాంశమవుతోంది. హనుమ విహారికి మద్దతుగా ఇప్పటికే క్రికెట్ వర్గాలు, టీమిండియాలో మాజీ సహచరులు కూడా స్పందిస్తున్న నేపథ్యంలో రాజకీయంగా కూడా మద్దతు పెరుగుతుండటం విశేషం.

English summary

In wake of hanuma vihari's exit from andhra cricket captaincy as well as team, tdp nara lokesh offers him to return to the state team within two months.