టీడీపీ ‘సంకెళ్ల’ ఫోటోషూట్, కొవ్వొత్తులతో ‘సెలెబ్రేషన్స్’ తో ప్రజలకు కొత్త అవగాహన!!

ఆంధ్రప్రదేశ్ రాష్ట్రంలో స్కిల్ డెవలప్మెంట్ కేసులో టిడిపి అధినేత, మాజీ సీఎం చంద్రబాబు నాయుడు అరెస్టు తర్వాత రాజకీయాలు రసవత్తరంగా మారాయి. అధికార ప్రతిపక్ష పార్టీ నేతల మధ్య ప్రచ్చన్న యుద్ధం కొనసాగుతుంది. తాజాగా వైసీపీ ఎంపీ విజయసాయిరెడ్డి చంద్రబాబు కోసం మేము సైతం అంటే తెలుగుదేశం పార్టీ చేస్తున్న ఆందోళనలపై తనదైన శైలిలో సెటైర్లు వేశారు.

హక్కుల కోసం పోరాడే పేదలను అణిచివేయాలని చూసినప్పుడు స్వేచ్ఛకు బేడీలు వేస్తారని పౌరసంఘాలు నిరసన తెలపడం చూశామని, చంద్రబాబు అనే అవినీతి తిమింగలం సాక్ష్యాధారాలతో అరెస్టు చేస్తే చేతులకు తాళ్లు, గొలుసులతో ప్రదర్శనలు చేసి పచ్చ పార్టీ పరువు తీసుకుంది అని వైసీపీ ఎంపీ విజయసాయిరెడ్డి ఎద్దేవా చేశారు. ఇదే సమయంలో ఈ ఫోటోషూట్ కి ఐడియా లోకేష్ దేనిని టిడిపివర్గాల భోగట్టా అంటూ లోకేష్ ను టార్గెట్ చేశారు.

వీళ్లు చేసే 'సంకెళ్ల' ఫోటోషూట్, లైట్లు ఆర్పేసి కొవ్వొత్తులు వెలిగించే 'సెలెబ్రేషన్స్' ప్రజలకు ఎంతగానో ఉపయోగపడుతున్నాయని, ప్రజలకు చంద్రబాబు గారు చేసిన స్కాంల గురించి అవగాహన పెంచుతున్నాయి అని వైసీపీ ఎంపీ విజయసాయిరెడ్డి అభిప్రాయపడ్డారు. నిరసన పేరుతో వీళ్లు డ్రామాలు చేసిన ప్రతిసారి ఒక వర్గం వాళ్లే తల్లడిల్లిపోతున్నారన్నారు. బాబు గారి జైలు పుణ్యాన వీళ్ల అసలు రూపాలు బయట పడ్డాయి అని విజయసాయిరెడ్డి టార్గెట్ చేశారు.

ఇదే సమయాల్లో తెలంగాణ ఎన్నికల్లో టిడిపి పోటీపై సెటైర్లు వేసిన విజయసాయిరెడ్డి తెలంగాణ ఎన్నికల్లో తెలుగుదేశం పార్టీ అన్ని సీట్లలో పోటీ చేయదట. క్యాండిడేట్లు దొరకడంలేదని అనుకోవాలా? అంటూ ప్రశ్నించారు. 87 సీట్లలో మాత్రమే అభ్యర్థులను నిలబెడతామని అక్కడి పార్టీ అధ్యక్షుడు ప్రకటించారన్నారు.

తెలంగాణ ప్రాంతానికి కూడా చంద్రబాబు గారు తొమ్మిదేళ్లు సిఎంగా ఉన్నారు అని గుర్తు చేసి, అన్ని స్థానాల్లో టిడిపి పోటీ చేయలేకపోవడం పై టీడీపీ బలహీన పడిందన్న అభిప్రాయం వ్యక్తం చేశారు. ఏపీలో పచ్చ పార్టీ పరిస్థితి ఇంకా దారుణంగా ఉందని వైసీపీ ఎంపీ విజయసాయి రెడ్డి పేర్కొన్నారు.

English summary

YCP MP Vijayasai Reddy said that with 'shackles' photo shoot and candles 'celebrations' people will get a new awareness about Chandrababu scams.