సొంత ఖర్చుతో కార్యకర్తలకు ఇళ్ళు కట్టిస్తున్న కేంద్రమంత్రి.. వారి పంట పండింది!
బీజేపీ సీనియర్ నాయకులు, కేంద్రమంత్రి భూపతిరాజు శ్రీనివాసవర్మ తన మానవత్వాన్ని, కార్యకర్తలపై ఉన్న ప్రేమను చాటుకున్నారు. నరసాపురం లోక్సభ నియోజకవర్గం నుంచి ప్రాతినిధ్యం వహిస్తున్న ఆయన, పశ్చిమ గోదావరి జిల్లాలో దశాబ్దాలుగా పార్టీ ఎదుగుదల కోసం శ్రమించిన ఇద్దరు సామాన్య కార్యకర్తల కుటుంబాలకు అండగా నిలిచారు. గతంలో తాను ఇచ్చిన మాటను నిలబెట్టుకుంటూ తన సొంత నిధులతో వారిద్దరికీ పక్కా గృహాలను నిర్మించి ఇస్తున్నారు.
బీజేపీ కోసం పని చేసిన కార్యకర్తలు
పశ్చిమ గోదావరి జిల్లా ఉండి నియోజకవర్గ పరిధిలోని పాలకోడేరు మండలం గొల్లలకోడేరు గ్రామానికి చెందిన మెట్ట లక్ష్మీనరసింహ శ్రీనివాస్ గతంలో బీజేపీ బలోపేతానికి ఎంతో కృషి చేశారు. అయితే కరోనా మహమ్మారి బారినపడి ఆయన కన్నుమూశారు. మరోవైపు, కొండేపూడి గ్రామానికి చెందిన రామారావు అనే సీనియర్ కార్యకర్త గత మూడు దశాబ్దాలుగా ఎటువంటి లబ్ధి ఆశించకుండా పార్టీ జెండాను మోస్తున్నారు.
ఒక్కో ఇంటికి సుమారు రూ.20 లక్షల చొప్పున సొంతఖర్చుతో గృహ నిర్మాణ పనులు
ఆర్థికంగా వెనుకబడిన ఈ రెండు కుటుంబాల పరిస్థితిని గమనించిన కేంద్రమంత్రి, ఒక్కో ఇంటికి సుమారు రూ.20 లక్షల చొప్పున సొంత ఖర్చుతో గృహ నిర్మాణ పనులను ప్రారంభించారు.
ప్రస్తుతం రామారావు ఇల్లు శ్లాబ్ దశకు చేరుకుంది. ఈ క్రమంలో నిర్మాణ పనులను క్షేత్రస్థాయిలో పరిశీలించిన శ్రీనివాసవర్మ.. స్వయంగా రంగంలోకి దిగి తానే స్వయంగా శ్రమదానం చేశారు.
కార్యకర్తల ఋణం మరువలేనన్న కేంద్ర మంత్రి
కేంద్రమంత్రి హోదాలో ఉన్నప్పటికీ సామాన్య కూలీలా మారి శ్లాబ్ పనుల్లో పాలుపంచుకోవడం స్థానికంగా అందరినీ ఆకట్టుకుంది. కార్యకర్తల త్యాగాలు, నిరంతర శ్రమ వల్లే తాను ఈ రోజు ఎంపీగా, కేంద్రమంత్రిగా ఈ స్థాయిలో ఉన్నానని, ఆ ఋణాన్ని ఎప్పటికీ మరువలేనని ఆయన ఈ సందర్భంగా భావోద్వేగంగా పేర్కొన్నారు.ఈ అరుదైన క్షణాలకు సంబంధించిన వీడియోను కేంద్రమంత్రి భూపతిరాజు శ్రీనివాసవర్మ తన సోషల్ మీడియా ఖాతా ద్వారా పంచుకున్నారు.
దశాబ్దాలుగా పార్టీ కోసం శ్రమిస్తున్న ఏ ఒక్క కార్యకర్త కష్టం వృథా పోదన్న కేంద్రమంత్రి
కొండేపూడి గ్రామానికి చెందిన సీనియర్ కార్యకర్త రామారావు గారికి ఇచ్చిన వాగ్దానాన్ని నెరవేరుస్తూ నా సొంత ఖర్చుతో ఇల్లు నిర్మిస్తున్నాం. ఈ రోజు ఆ ఇంటి శ్లాబ్ నిర్మాణంలో స్వయంగా పాల్గొని కార్యకర్తలతో కలిసి శ్రమదానం చేయడం నాకు ఎనలేని ఆనందాన్ని, మానసిక సంతృప్తిని ఇచ్చింది. ఎలాంటి స్వార్థం లేకుండా దశాబ్దాలుగా పార్టీ కోసం శ్రమిస్తున్న ఏ ఒక్క కార్యకర్త కష్టం వృథా పోదు. బీజేపీ తన కార్యకర్తలను ఎల్లప్పుడూ కంటికి రెప్పలా కాపాడుకుంటుంది" అని ఆయన ట్వీట్ చేశారు.
Click it and Unblock the Notifications
Sign in with Google