'కాపు' కాస్తున్న వైసీపీ, కీలక మలుపు- గోదావరి గట్టున బిగ్ ప్లాన్..!!
ఏపీలో రాజకీయ సమీకరణాలు వేగంగా మారుతున్నాయి. కూటమి- వైసీపీ మధ్య కొత్త వ్యూహాలు తెర మీదకు వస్తున్నాయి. రెండేళ్ల పాలన పూర్తి చేసుకున్న కూటమి ప్రభుత్వం ఇక ప్రజల్లోకి తమ విజయాలను తీసుకెళ్లాలని డిసైడ్ అయింది. ఇటు ప్రభుత్వానికి వ్యతిరేకంగా ప్రజా నిరసనలకు సిద్దం కావాలని జగన్ డిసైడ్ అయ్యారు. ఈ క్రమంలోనే గోదావరి జిల్లాలే కేంద్రంగా వైసీపీ కాపు రాజకీయంలో కీలక అడుగు వేస్తోంది. పార్టీ తాజా నిర్ణయం ఇప్పుడు రాజకీయంగా ఆసక్తి కరంగా మారుతోంది.
ఏపీలో 2029 ఎన్నికలే లక్ష్యంగా కొత్త రాజకీయం మొదలైంది. గోదావరి జిల్లాల్లో పవన్ ప్రభావం తో 2024 ఎన్నికల్లో వైసీపీ కి ఊహించని ఎదురుదెబ్బ తగిలింది. కాపు సామాజిక వర్గంలో మెజార్టీ ఓటర్లు కూటమికే మద్దతు ప్రకటించారు. ఇక.. ఇప్పుడు ప్రభుత్వం ఏర్పడిన రెండేళ్ల తరువాత వైసీపీ కొత్త వ్యూహం మొదలు పెట్టింది. కాపు వర్గానికి దగ్గర అయ్యేందుకు.. వారితో మమేకం అయ్యేలా వ్యూహాలు సిద్దం చేస్తోంది. తాజాగా పార్టీలోని కాపు ముఖ్య నేతలు తోట త్రిమూర్తులు, అంబటి , కన్నబాబు తో సహా మరికొందరు ఇతర నేతలతో మాజీ సీఎం జగన్ సమావేశం అయ్యారు. తాజాగా గోదావరి జిల్లాల్లో మారుతున్న లెక్కలు.. క్షేత్ర స్థాయి సమాచారం పైన చర్చ జరిగింది. డిప్యూటీ సీఎం పవన్ కల్యాణ్ ఈ మధ్య కాలంలో చేసిన వ్యాఖ్యలు.. భిన్నాభిప్రాయాలు వ్యక్తం అవుతున్న అంశాల పైన సుదీర్ఘంగా చర్చించారు.
21న కాపు నేతల కీలక సమావేశం
వైసీపీ హయాంలో అమలు చేసిన కాపు నేస్తం వంటి పథకాల పైనా లోతుగా చర్చ చేసారు. ఇదే సమయంలో పార్టీలోని కాపు నేతలంతా సమావేశం నిర్వహించి... ఏ విధంగా రాజకీయ వ్యూహాలు అమలు చేయాలనేది డిసైడ్ చేయాలని నిర్ణయించారు. అందులో భాగంగా ఈ నెల 21వ తేదీన మాజీ మంత్రి.. ప్రస్తుత ఎమ్మెల్సీ తోట త్రిమూర్తులు రామచంద్రాపురంలోని తన నివాసంలో ఏర్పాటు చేసిన లంచ్ మీటింగ్ కు రావాలంటూ వ్యక్తిగతంగా అందరికీ ఫోన్ చేసి ఆహ్వానిస్తు న్నారు. ఈ సమావేశంలో రెండేళ్ల కూటమి ప్రభుత్వం పైనా కాపు సామాజిక వర్గంలో వ్యక్తం అవుతున్న అభిప్రాయాలు.. తాము నిర్వహించాల్సిన పాత్ర.. భవిష్యత్ ప్రణాళికల పైన ఒక నిర్ణయానికి రానున్నారు. ఆ తరువాత గుంటూరు కేంద్రంగా మరో సమావేశం ఏర్పాటు చేయాలని భావిస్తున్నారు. చివరగా జగన్ సమక్షంలో కాపు నేతలు భేటీ అయి.. పార్టీ పరంగా కార్యాచరణ ప్రకటించేలా ప్రణాళికలు సిద్దం చేస్తున్నారు. దీంతో.. ఇప్పుడు వైసీపీలోని కాపు నేతల కొత్త రాజకీయం ఆసక్తి కరంగా మారుతోంది.
Click it and Unblock the Notifications
Sign in with Google