Gold: గ్రహణం పట్టిందా?.. లక్షన్నర మార్కుకు చేరిన బంగారం!
మదుపరులకు స్వర్గధామంగా భావించే 'బంగారం' ఒక్కసారిగా తన మెరుపును కోల్పోయిందా? గత కొన్నాళ్లుగా ఆకాశమే హద్దుగా దూసుకుపోయిన పసిడి ధరలు ఒక్కసారిగా ఎందుకు నీరసించాయి? మే 4 (సోమవారం) మధ్యాహ్నం వేళ గోల్డ్ మార్కెట్లో చోటుచేసుకున్న ఈ అనూహ్య మార్పులు ఇప్పుడు ఇన్వెస్టర్లలో ఉత్కంఠ రేపుతున్నాయి.
సోమవారం మధ్యాహ్నం బంగారం సంబంధిత పెట్టుబడులు (Gold ETFs) భారీగా నష్టపోయాయి. ప్రధానంగా డాలర్ ఇండెక్స్ బలంగా పుంజుకోవడం, ముడి చమురు ధరలు ఆకాశాన్నంటడం పసిడిపై ఒత్తిడిని పెంచాయి. దీని ప్రభావంతో హెచ్ఎస్బీసీ గోల్డ్ ఈటీఎఫ్ 1.79%, ఇన్వెస్కో ఇండియా 1.42%, యాక్సిస్ గోల్డ్ ఈటీఎఫ్ 1.24% చొప్పున పడిపోయాయి. బంగారంపై నమ్మకంతో పెట్టుబడి పెట్టిన వారికి ఈ పతనం మింగుడు పడటం లేదు.
ఎంసీఎక్స్లో భారీ పతనం.. లక్షన్నర మార్కు వద్ద పసిడి:
దేశీయ కమోడిటీ మార్కెట్ (MCX)లో బంగారం ధరలు భారీగా క్షీణించాయి. కేవలం ఒక్క రోజులోనే 10 గ్రాముల బంగారంపై సుమారు రూ. 1,652 మేర తగ్గి, ధర రూ. 1,50,889 వద్ద ట్రేడవుతోంది. అంతర్జాతీయంగా ముడి చమురు ధరలు బ్యారెల్కు $114 మార్కుకు చేరువ కావడంతో డాలర్కు డిమాండ్ పెరిగింది. సాధారణంగా డాలర్ బలపడితే బంగారం ధరలు తగ్గుతాయన్న మార్కెట్ సూత్రం ఇక్కడ అక్షరాలా నిజమైంది.
ఇరాన్ యుద్ధం - ట్రంప్ వ్యాఖ్యల సెగ:
బంగారం ధరల్లో ఈ అనిశ్చితికి ప్రధాన కారణం పశ్చిమాసియాలో ముదురుతున్న యుద్ధ మేఘాలే. ఇరాన్ శాంతి ప్రతిపాదనలను అమెరికా అధ్యక్షుడు డొనాల్డ్ ట్రంప్ తోసిపుచ్చడం మార్కెట్లలో ఆందోళన నింపింది. ముడి చమురు సరఫరాకు కీలకమైన 'స్ట్రెయిట్ ఆఫ్ హార్ముజ్' ప్రాంతంలో ఉద్రిక్తతలు పెరగడం వల్ల చమురు దిగుమతి చేసుకునే భారత్ వంటి దేశాల కరెన్సీలపై ఒత్తిడి పెరుగుతోంది. డాలర్ వడ్డీ రేట్ల తగ్గింపు ఇప్పుడప్పుడే ఉండకపోవచ్చన్న వార్తలు కూడా పసిడిని దెబ్బతీశాయి.
మదుపరులు ఏం చేయాలి?
బంగారం ధరలు తగ్గాయని ఆందోళన చెందాల్సిన పని లేదని నిపుణులు సూచిస్తున్నారు. "బంగారం ప్రస్తుతం స్థిరీకరణ (Consolidation) దశలో ఉంది. ఇది దీర్ఘకాలిక పెట్టుబడిదారులకు ఒక మంచి అవకాశం" అని వెల్త్మిల్స్ సెక్యూరిటీస్ నిపుణులు అభిప్రాయపడుతున్నారు. ఒక్కసారిగా కాకుండా, విడతల వారీగా బంగారం కొనడానికి ఇది సరైన సమయం. వచ్చే రెండేళ్ల కాలాన్ని దృష్టిలో ఉంచుకుంటే, డాలర్ విలువ తగ్గగానే బంగారం మళ్ళీ ఊహించని రీతిలో పుంజుకునే అవకాశం ఉంది.
Click it and Unblock the Notifications
Sign in with Google