బడ్జెట్ ధరలో అదిరిపోయే లుక్.. హోండా షైన్ 125 కొత్త మోడల్ వచ్చేస్తోంది!

ప్రముఖ ఆటోమొబైల్ దిగ్గజం హోండా నుంచి అదిరిపోయే అప్‌డేట్ వచ్చింది. భారతీయ కమ్యూటర్ బైక్ మార్కెట్లో రారాజుగా వెలుగొందుతున్న హోండా షైన్ 125 ఇప్పుడు మరింత స్టైలిష్‌గా ముస్తాబైంది. హోండా మోటార్ సైకిల్ అండ్ స్కూటర్ ఇండియా షైన్ 125 మోడల్‌లో సరికొత్త లిమిటెడ్ ఎడిషన్‌ను ఆవిష్కరించింది. కేవలం కాస్మెటిక్ మార్పులతో సరికొత్త లుక్‌లో ఈ బైక్ రానుంది. కస్టమర్లను ఆకట్టుకునేందుకు కంపెనీ ఇందులో కొన్ని విజువల్ అప్‌గ్రేడ్స్ చేసింది. ఈ కొత్త ఎడిషన్ ప్రధానంగా యువతను, క్లాసీ లుక్ కోరుకునే రైడర్లను లక్ష్యంగా చేసుకుని రూపొందించబడింది.

ఆకట్టుకునే కొత్త డిజైన్, రంగులు
ఈ లిమిటెడ్ ఎడిషన్‌లో ప్రధాన ఆకర్షణ దాని 'పెర్ల్ సైరన్ బ్లూ' కలర్ స్కీమ్. దీనికి తోడు డార్క్ బ్లూ బాడీ ప్యానెల్స్ బైక్‌కు మరింత ప్రీమియం, బోల్డ్ లుక్‌ను ఇస్తున్నాయి. సాధారణ మోడల్స్‌తో పోలిస్తే, ఇందులో ఫ్యూయల్ ట్యాంక్, ఫ్రంట్ వైజర్, సైడ్ కవర్లపై ఆకర్షణీయమైన కొత్త గ్రాఫిక్స్‌ను జోడించారు. అంతేకాకుండా ఈ ఎడిషన్‌లో ప్రత్యేకంగా పైరైట్ బ్రౌన్ ఫినిషింగ్ ఉన్న అలాయ్ వీల్స్‌ను అందించారు. ఇది బైక్‌కు ఒక క్లాసీ, విభిన్నమైన గుర్తింపును ఇస్తుంది.

నమ్మకమైన ఇంజిన్, అద్భుతమైన పనితీరు
మెకానికల్‌గా ఈ లిమిటెడ్ ఎడిషన్‌లో ఎలాంటి మార్పులు చేయలేదు. ఇందులో నమ్మకమైన 123.94సీసీ, బీఎస్-6 (OBD2B) ప్రమాణాలతో కూడిన ఎయిర్-కూల్డ్, సింగిల్ సిలిండర్ ఇంజిన్‌ను వాడారు. ఇది 7,500 rpm వద్ద సుమారు 10.6 hp పవర్‌ను, 6,000 rpm వద్ద 11 Nm టార్క్‌ను ఉత్పత్తి చేస్తుంది. స్మూత్ పవర్ డెలివరీ, అద్భుతమైన ఇంధన సామర్థ్యానికి (మైలేజ్) పేరుగాంచిన ఈ ఇంజిన్‌కు 5-స్పీడ్ గేర్‌బాక్స్‌ను జతచేశారు.

కంఫర్ట్, సేఫ్టీ ఫీచర్లు
ఈ బైక్ బరువు కేవలం 113 కిలోలు ఉండటం వల్ల నగర ట్రాఫిక్‌లో నడపడం చాలా సులభం. దీని సీటు ఎత్తు 791 మిల్లీమీటర్లు, గ్రౌండ్ క్లియరెన్స్ 162 మిల్లీమీటర్లుగా ఉంది, ఇది భారతీయ రోడ్లకు, సగటు ఎత్తు ఉన్న రైడర్లకు సౌకర్యవంతంగా ఉంటుంది. భద్రత కోసం ఇందులో సీబీఎస్ (Combi Brake System) తో కూడిన ఈక్వలైజర్‌ను అందించారు. అదనపు సౌకర్యం కోసం ఇంటిగ్రేటెడ్ హెడ్‌ల్యాంప్ బీమ్, పాసింగ్ స్విచ్, అలాగే సైడ్ స్టాండ్ ఇండికేటర్ విత్ ఇంజిన్ కటాఫ్ వంటి ఫీచర్లు కూడా ఉన్నాయి.

ధర, లభ్యత
హోండా సంస్థ ఈ లిమిటెడ్ ఎడిషన్ ధరను ఇంకా అధికారికంగా ప్రకటించనప్పటికీ.. ప్రస్తుతం మార్కెట్‌లో ఉన్న షైన్ 125 డిస్క్ వేరియంట్ (ధర రూ.85,211 ఎక్స్-షోరూమ్) కంటే ఇది సుమారు రూ.1,500 నుండి రూ.2,000 వరకు ఎక్కువగా ఉండే అవకాశం ఉంది. అంటే దీని ఎక్స్-షోరూమ్ ధర సుమారు రూ.86,700 నుండి రూ.87,000 మధ్యలో ఉండవచ్చు. ఈ బైక్ త్వరలోనే దేశవ్యాప్తంగా ఉన్న హోండా డీలర్‌షిప్‌లలో అందుబాటులోకి రానుంది.

English summary

Honda Shine 125 Limited Edition unveiled by Honda Motorcycle India . Explore the new Pearl Siren Blue color, pyrite brown alloys, and expected price of this stylish 125cc bike.