HRA: హైదరాబాద్ లో ఉండే వారికి భారీ గుడ్ న్యూస్, ఏప్రిల్ 1 నుంచే..

భాగ్యనగర వాసులకు కేంద్ర ప్రభుత్వం తీపి కబురు అందించింది. దశాబ్దాల కాలం నాటి పాత పన్ను చట్టం స్థానంలో తీసుకొచ్చిన 'ఆదాయపు పన్ను చట్టం-2025' అమలుకు ముహూర్తం ఖరారైంది. దీనికి సంబంధించి 'ఆదాయపు పన్ను నిబంధనలు-2026'ను కేంద్ర ప్రత్యక్ష పన్నుల బోర్డు (CBDT) నోటిఫై చేసింది. 2026 ఏప్రిల్ 1 నుంచి అమల్లోకి రానున్న ఈ కొత్త రూల్స్ ద్వారా ముఖ్యంగా హైదరాబాద్‌లోని సాఫ్ట్‌వేర్ ఉద్యోగులు, వేతన జీవులకు ఇంటి అద్దె భత్యం (HRA) విషయంలో భారీ ప్రయోజనం చేకూరనుంది.

ఇప్పటివరకు ఆదాయపు పన్ను నిబంధనల ప్రకారం.. కేవలం ఢిల్లీ, ముంబై, కోల్‌కతా, చెన్నై నగరాల్లో ఉండేవారికి మాత్రమే మూల వేతనంలో (Basic Salary) 50% వరకు హెచ్‌ఆర్‌ఏ పన్ను మినహాయింపు లభించేది. ఇప్పుడు ఈ జాబితాను కేంద్రం ఎనిమిదికి పెంచింది. కొత్తగా హైదరాబాద్, బెంగళూరు, పుణె, అహ్మదాబాద్ నగరాలను ఈ పరిధిలోకి చేర్చారు. ఫలితంగా హైదరాబాద్‌లో నివసించే ఉద్యోగులు ఇకపై తమ బేసిక్ శాలరీలో 50 శాతం వరకు అద్దె మినహాయింపును క్లెయిమ్ చేసుకోవచ్చు. అయితే, పాత పన్ను విధానాన్ని (Old Tax Regime) ఎంచుకునే వారికి మాత్రమే ఈ లబ్ధి చేకూరుతుంది. ఈ మినహాయింపు పొందాలంటే అద్దెదారు-యజమాని మధ్య ఒప్పంద వివరాలను వెల్లడించడం తప్పనిసరి.

సులభతరం.. పారదర్శకం!

1961 నాటి పాత చట్టంలోని సంక్లిష్టతలను తొలగిస్తూ రూపొందించిన ఈ కొత్త చట్టం, పన్ను రేట్లను మార్చకుండానే నిబంధనలను సరళీకరించింది. గతంలో ఉన్న 819 సెక్షన్లను 536కు తగ్గించారు. చట్టంలోని పదాల సంఖ్యను కూడా సగానికి పైగా తగ్గించి, సామాన్యులకు అర్థమయ్యేలా 40 కొత్త సూత్రాలను, 39 పట్టికలను ప్రవేశపెట్టారు. పన్ను చెల్లింపుదారులు సులభంగా రిటర్నులు దాఖలు చేసేలా దాదాపు 150కి పైగా కొత్త అధికారిక ఫారాలను సిద్ధం చేశారు.

పాన్ (PAN) నిబంధనల్లో మార్పులు ఇవే:

కొత్త నిబంధనల ప్రకారం కొన్ని ఆర్థిక లావాదేవీలకు పాన్ కార్డు సమర్పించే పరిమితుల్లో కీలక మార్పులు చేశారు:

• బ్యాంకు లావాదేవీలు: ఏడాదిలో రూ.10 లక్షలకు మించి నగదు జమ చేసినా లేదా ఉపసంహరించుకున్నా పాన్ తప్పనిసరి.
• స్థిరాస్తులు: ఇల్లు లేదా స్థలాల కొనుగోలు, అమ్మకం విలువ రూ.20 లక్షలు దాటితే పాన్ వివరాలు ఇవ్వాలి (గతంలో ఇది రూ.10 లక్షలు).
• వాహనాలు: రూ.5 లక్షలు దాటే ఏ వాహనం కొన్నా (ద్విచక్ర వాహనాలతో సహా) పాన్ అవసరం. గతంలో టూ-వీలర్లకు ఈ నిబంధన లేదు.
• ఈవెంట్లు & హోటళ్లు: హోటల్ బిల్లులు లేదా ఈవెంట్ మేనేజ్‌మెంట్ సంస్థలకు చేసే చెల్లింపులు రూ.1 లక్ష దాటితే పాన్ కార్డు చూపాల్సిందే.

ఎలక్ట్రిక్ వాహనాలకు ప్రోత్సాహం

పర్యావరణ హితమైన ఎలక్ట్రిక్ వాహనాల (EV) వాడకాన్ని ప్రోత్సహించేలా కొత్త పన్ను నిబంధనల్లో ఊరట కల్పించారు. ఆఫీసు మరియు వ్యక్తిగత అవసరాలకు సంయుక్తంగా ఈవీలను వాడే ఉద్యోగులకు ఇచ్చే అదనపు ప్రయోజనాల (Perquisites) విలువను ఇకపై తక్కువగా లెక్కిస్తారు. వీటిని 1.6 లీటర్ల లోపు సామర్థ్యం ఉన్న చిన్న కార్లతో సమానంగా పరిగణించడం వల్ల పన్ను భారం తగ్గుతుంది.

మొత్తానికి, ఆరు దశాబ్దాల తర్వాత వచ్చిన ఈ సమూల మార్పులు పన్నుల వ్యవస్థలో పారదర్శకతను పెంచుతూనే, మధ్యతరగతి ప్రజలకు, ముఖ్యంగా మెట్రో నగరాల్లోని వేతన జీవులకు ఆర్థికంగా అండగా నిలవనున్నాయి.

English summary

Central Board of Direct Taxes (CBDT) notifies Income Tax Rules 2026. Hyderabad, Bengaluru, Pune, and Ahmedabad now qualify for 50% HRA deduction. Learn about new PAN limits for cash, property, and EV perks.