కొంపముంచిన యువతి స్నేహం: ఇన్‌స్టాగ్రాం ఫెండ్ అని ఇంటికి పిలిస్తే.. బంగారమంతా ఊడ్చేశాడు

Published: Thursday, May 5, 2022, 15:35 [IST]

హైదరాబాద్: సోషల్ మీడియా ఇప్పుడు చిన్నాపెద్దా అని తేడా లేకుండా ఉపయోగిస్తున్న ఫ్లాట్‌ఫామ్. స్వయంగా తెలిసిన స్నేహితులకంటే కూడా ఈ సోషల్ మీడియా ద్వారానే ఎక్కువ మందితో కనెక్ట్ అవుతున్నారు జనాలు. అయితే, సోషల్ మీడియాలో పరిచయమైన వ్యక్తి గురించి ఎలాంటి విషయాలు తెలియకున్నా వారికి దగ్గరవడం అనేక నేరాలు, మోసాలకు కారణమవుతున్నాయి. అయినా, యువత మాత్రం అప్రమత్తంగా ఉండటం లేదు.

ఇన్‌స్టాగ్రాంలో ఇంటర్ విద్యార్థిని ఫ్రెండ్ రిక్వెస్ట్

తాజాగా, హైదరాబాద్ నగరంలోనూ సోషల్ మీడియా దిగ్జజం ఇన్‌స్టాగ్రామ్ ద్వారా పరిచయమైన స్నేహితుడి చేతిలో మోసపోయింది ఓ యువతి. పోలీసులు తెలిపిన వివరాల ప్రకారం.. కామారెడ్డి జిల్లా లింగంపేట మండలం బోనల్ తండాలోని చింతలగుట్టకు చెందిన బానోతు సురేష్ అలియాస్ సన్నీ(22) జగద్గిరిగుట్ట పరిధి వెంకటేశ్వరనగర్‌లో ఉంటూ స్విగ్గీ డెలివరీ బాయ్‌గా పనిచేస్తున్నాడు. ఇన్‌స్టాగ్రాంలో అందమైన ఫొటోను ప్రొఫైల్ పిక్‌గా పెట్టాడు. ఈ క్రమంలో మూసాపేట శ్రీహరినగర్‌కు చెందిన ఇంటర్ విద్యార్థిని అతనికి ఫ్రెండ్ రిక్వెస్ట్ పెట్టింది. దీంతో పలుమార్లు వీరిద్దరి మధ్య చాటింగ్ కొనసాగింది.

ఉన్న బంగారమంతా ఊడ్చేసిన ఇన్‌స్టాగ్రాం ఫ్రెండ్

ఈ క్రమంలో ఏప్రిల్ నెల 20న తల్లిదండ్రులు ఏదో పనిమీద ఊరేళ్లడంతో ఆ యువతి.. ఫోన్ చేసి సన్నీని ఇంటికి ఆహ్వానించింది. అతడ్ని ఇంట్లోనే కూర్చోబెట్టి కూల్ డ్రింక్ తీసుకొస్తానని బయటకి వెళ్లింది. అదే అదనుగా బీరువాలోని బంగారు ఆభరణాలను తన జేబులో వేసుకున్నాడు సన్నీ. ఆ తర్వాత ఆమెతో కొద్ది సేపు మాట్లాడి వెళ్లిపోయాడు. అనంతరం ఏప్రిల్ 24వ తేదీన మరోసారి ఆమె ఇంటికి వచ్చిన సన్నీ.. 20 తులాల నగలు, రూ. 10వేలతో ఉడాయించాడు.

లబోదిబోమంటూ పోలీసుల వద్దకు తల్లిదండ్రులు.. గుట్టువిప్పిన కూతురు

ఆలస్యంగా గుర్తించిన కుటుంబసభ్యులు మే 1న కూకట్‌పల్లి పోలీసులకు ఫిర్యాదు చేశారు. పోలీసులు ఇంట్లోవారిని విచారించగా.. సురేష్ అలియాస్ సన్నీ ఇంటికి వచ్చి వెళ్లినట్లు ఇంటర్ విద్యార్థిని తెలిపింది. ఘటనపై దర్యాప్తు జరిపిన పోలీసులు.. బుధవారం నిందితుడు సన్నీ అదుపులోకి తీసుకుని విచారిస్తున్నారు. ఇలా సోషల్ మీడియాలో ఎలాంటి పరిచయం లేని వ్యక్తులతో స్నేహం చేసి మోసవపోవద్దని పోలీసులు సూచిస్తున్నారు.

Published On May 5, 2022