Hyderabad: శంషాబాద్ విమానాశ్రయంలో చిరుత కలకలం

హైదరాబాద్: శంషాబాద్ విమానాశ్రయం సమీపంలో చిరుత సంచారం కలకలం సృష్టిస్తోంది. ఆదివారం తెల్లవారుజామున విమానాశ్రయం పెట్రోలింగ్ సిబ్బంది రన్‌‌వేపై చిరుతను గుర్తించారు. విమానాశ్రయ పరిసరాల్లో చిరుతపులి సంచరిస్తోందనే సమాచారాన్ని ఎయిర్ పోర్ట్ సిబ్బంది.. అటవీశాఖ అధికారులకు అందించారు.

విమానాశ్రయం వద్దకు చేరుకున్న వన్యప్రాణి విభాగం సిబ్బంది, జూ అధికారులు చిరుత కోసం పరిసర ప్రాంతాలు గాలింపు చేపట్టారు. ఆదివారం తెల్లవారుజామున 3.30 గంటల ప్రాంతంలో శంషాబాద్ మున్సిపాలిటీ పరిధిలోని గొల్లపల్లి వద్ద ఎయిర్ పోర్ట్ ప్రహారీ నుంచి చిరుత దూకిందని తెలిసింది. దీంతో చిరుతతోపాటు రెండు చిరుత పిల్లలు కూడా ఉన్నట్లు సమాచారం.

ఎయిర్ పోర్ట్ ప్రహారీ దూకుతుండగా ఫెన్సింగ్ వైర్లకు చిరుత తగలడంతో ఎయిర్ పోర్ట్ కంట్రోల్ రూంలో అలారం మోగింది. దీంతో కంట్రోల్ రూం సెక్యూరిటీ సిబ్బంది అప్రమత్తమయ్యారు. సీసీ కెమెరాలను పరిశీలించడంతో చిరుత సంచరించినట్లు గుర్తించారు. చిరుతతోపాటు రెండు చిరుత పిల్లలు కూడా ఉన్నట్లు అక్కడి కెమెరాల్లో రికార్డయ్యింది.

అటవీశాఖ అధికారులకు సమాచారం అందించడంతో వారు అక్కడికి చేరుకుని చిరుతను బంధించేందుకు ప్రయత్నాలు చేస్తున్నారు. చిరుతలను బంధించేందుకు బోన్‌లు ఏర్పాటు చేస్తున్నారు. దాదాపు మూైడేళ్ల క్రితం కూడా ఇలాంటి ఘటనే చోటు చేసుకుంది. ఓ చిరుత విమానాశ్రయం గోడ దూకినట్లు సీసీ కెమెరాల్లో రికార్డైంది. తాజాగా, మరోసారి చిరుత సంచారంతో విమానాశ్రయ సిబ్బందితోపాటు స్థానికులు భయాందోళనలకు గురవుతున్నారు.

English summary

Leopard appeared in shamshabad airport promises.