ఈ అకౌంట్కు డబ్బులు పంపింతే పుణ్యం కాదు.. పాపం చుట్టుకుంటుంది: ప్రధాని పేరు మీద ఫేక్ యూపీఐ ఐడీ..!
న్యూఢిల్లీ: సంక్షోభంలో అవకాశాన్ని సృష్టించుకుంటున్నారు కొందరు ఘనులు. దేశవ్యాప్తంగా లాక్డౌన్ ప్రకటించిన నేపథ్యంలో పేదలను ఆదుకోవడానికి ఆర్థిక ప్యాకేజీని ప్రకటించింది కేంద్ర ప్రభుత్వం. కరోనా నివారణ చర్యల కోసం వేల కోట్ల రూపాయలను కేటాయించింది. ఈ పరిస్థితుల్లో కేంద్రానికి ఆర్థికంగా కొద్ద, గొప్పో సహాయం చేయడానికి ప్రజలు దేశవ్యాప్తంగా సానుకూలంగా స్పందిస్తున్నారు. తమకు తోచిన మొత్తాన్ని ప్రధానమంత్రి సహాయనిధికి పంపిస్తున్నారు.
దీన్ని సైతం సొమ్ము చేసుకుంటున్నారు కొందరు కక్కుర్తిగాళ్లు. ఏకంగా ప్రధానమంత్రి పేరు మీదే ఓ నకిలీ యూపీఐ ఐడీని సృష్టించారు. కరోనా వైరస్ బాధితుల ఆదుకోవడానికి కేంద్రం చేపట్టిన సహాయక చర్యల కోసం విరాళాలను పంపించే వారు ఫలానా ఐడీలో డబ్బులను జమ చేయాల్సి ఉంటుందని సూచిస్తున్నారు. సోషల్ మీడియా వేదికగా ఆ నకిలీ యూపీఐ ఐడీని విస్తృతంగా ప్రచారంలోకి తీసుకొచ్చారు. ఆ నకిలీ ఐడీ pmcare@upi.
దీనికి జమ చేసిన విరాళాలు ఆ నకిలీ ఖాతాను సృష్టించిన వాడి జేబుల్లోకి వెళ్తాయే తప్ప.. ప్రధానమంత్రి సహాయనిధికి చేరదు. ఈ ఐడీ కాస్తా నకిలీదని అధికారులు గుర్తించారు. ఈ యూపీఐ ఐడీకి దాతలు ఎవరూ విరాళాలను పంపించవద్దని కేంద్ర ప్రభుత్వ అధికారులు సూచించారు. అసలు ఐడీ pmcare@sbi. దీనికి మాత్రమే విరాళాలను పంపించాలని కోరారు. భుబనేశ్వర్ కుమార్ అనే వ్యక్తి ప్రధానమంత్రి పేరు మీద నకిలీ ఐడీని సృష్టించిట్లుగా నిర్ధారించారు. అతణ్ని ఇప్పటికే అరెస్టు చేశారు.