అధికార కూటమికి నూకలు చెల్లాయ్

Nitish Kumar: బిహార్‌లో అధికారంలో ఉన్న మహాకూటమి ప్రభుత్వం కుప్పకూలింది. జనతాదళ్ యునైటెడ్- రాష్ట్రీయ జనతాదళ్- కాంగ్రెస్ మహా ఘట్‌బంధన్ సంకీర్ణ ప్రభుత్వానికి నూకలు చెల్లాయి. ఈ కూటమి నుంచి బయటికి రావాలని జేడీయూ నిర్ణయించింది. భారతీయ జనతా పార్టీ సారథ్యంలోని ఎన్డీఏలో చేరడానికి రంగం సిద్ధం చేసుకుంది.

రెండు రోజులుగా అనేక మలుపులు తిరుగుతున్న బిహార్‌లో నెలకొన్న రాజకీయ అనిశ్చితికి జేడీయూ తెరదించింది. కూటమి నుంచి తప్పుకోవాలని నిర్ణయించుకున్నట్లు ఆ పార్టీ వెల్లడించింది. మహా కూటమి నుంచి వైదొలగడంలో భాగంగా జేడీయూ చీఫ్, ముఖ్యమంత్రి నితీష్ కుమార్ తన పదవికి రాజీనామా చేస్తారని తెలిపింది.

ఈ నేపథ్యంలో- జేడీయూ శాసన సభా పక్షం ఆదివారం ఉదయం 10 గంటలకు పాట్నాలో సమావేశం కానుంది. అనంతరం ముఖ్యమంత్రి నితీష్ కుమార్ తన పదవికి రాజీనామా చేస్తారు. మధ్యాహ్నం 12 గంటలకు రాజ్‌భవన్‌కు వెళ్లి గవర్నర్ రాజేంద్ర అర్లేకర్‌కు తన రాజీనామా పత్రాన్ని సమర్పిస్తారు.

అనంతరం ఎన్డీఏ కూటమితో కలిసి ప్రభుత్వాన్ని ఏర్పాటు చేస్తారు. తనకు మద్దతు ఇవ్వనున్న జేడీయూ, బీజేపీ- దాని మిత్రపక్షాల శాసన సభ్యుల సంతకాలతో కూడిన పత్రాన్ని గవర్నర్‌కు అందజేస్తారు. ప్రభుత్వాన్ని ఏర్పాటు చేయడానికి తమ కూటమిని ఆహ్వానించాల్సిందిగా విజ్ఞప్తి చేస్తారు.

243 స్థానాలు ఉన్న బిహార్ అసెంబ్లీలో ప్రభుత్వాన్ని ఏర్పాటు చేయడానికి కావాల్సిన మేజిక్ ఫిగర్.. 122. జేడీయూకు 45 స్థానాలు ఉన్నాయి. బీజేపీకి ఉన్న 78, దాని మిత్రపక్షం హిందుస్తాన్ ఆవామీ లీగ్-4 స్థానాలను కలుపుకొంటే ఈ మేజిక్ ఫిగర్‌ను అందుకోగలుగుతుంది.

జేడీయూ, బీజేపీ, ఆవామీ లీగ్‌కు చెందిన 127 మంది సభ్యులు.. నితీష్ కుమార్ నాయకత్వాన్ని సమర్థించడం ఖాయంగా కనిపిస్తోంది. తనకు మద్దతు ఇస్తోన్న సభ్యులతో కూడిన పత్రాన్ని గవర్నర్‌కు అందజేసిన అనంతరం ఆయన ఆహ్వానం మేరకు ఆదివారం సాయంత్రం 4 గంటలకు మరోసారి ముఖ్యమంత్రిగా ప్రమాణ స్వీకారం చేస్తారని తెలుస్తోంది.

English summary

Bihar Chief Minister Nitish Kumar is likely to submit his resignation on the morning of January 28, and he will be take oath as CM by evening same day.