ల్యాప్ టాప్, ట్యాబ్లెట్, కంప్యూటర్లపై కేంద్రం షాక్-తక్షణం దిగుమతుల నిలిపివేత..!

Updated: Thursday, August 3, 2023, 13:19 [IST]

దేశంలోకి విదేశాల నుంచి దిగుమతి అవుతున్న ల్యాప్ టాప్స్, ట్యాబ్లెట్లు, కంప్యూటర్ల దిగుమతుల విషయంలో కేంద్రం కీలక నిర్ణయం తీసుకుంది. ల్యాప్ టాప్స్, ట్యాబ్లెట్లు, కంప్యూటర్లను విదేశాల నుంచి దిగుమతి చేసుకోకుండా ఆంక్షలు విధిస్తూ కేంద్రం ఆదేశాలు జారీ చేసింది. ఈ మేరకు జీఎస్టీ కోడ్ హెచ్‌ఎస్‌ఎన్ 8471 కింద ల్యాప్‌టాప్‌లు, టాబ్లెట్‌లు, పర్సనల్ కంప్యూటర్‌ల దిగుమతులపై ఆంక్షలు విధించినట్లు డైరెక్టరేట్ జనరల్ ఆఫ్ ఫారిన్ ట్రేడ్ నోటీసులో తెలిపింది.

అయితే ఈ ఆంక్షలు ప్రస్తుతం అమల్లో ఉన్న బ్యాగేజీ దిగుమతులకు వర్తించబోవని వాణిజ్య, పరిశ్రమల శాఖ తెలిపింది.ఇ-కామర్స్ పోర్టల్‌ల నుండి పోస్ట్ లేదా కొరియర్ ద్వారా కొనుగోలు చేసిన వాటితో సహా ల్యాప్‌టాప్, టాబ్లెట్, ఆల్-ఇన్-వన్ పర్సనల్ కంప్యూటర్ లేదా అల్ట్రా స్మాల్ ఫారమ్ ఫ్యాక్టర్ కంప్యూటర్‌ను దిగుమతి చేసుకునేందుకు దిగుమతి లైసెన్సింగ్ ఆంక్షల నుంచి మినహాయింపు ఇచ్చినట్లు తెలిపింది.

రీసెర్చ్ అండ్ డెవలప్‌మెంట్ టెస్టింగ్ బెంచ్‌మార్కింగ్, ఎవాల్యుయేషన్ రిపేర్, రీ-ఎగుమతి, ఉత్పత్తి అభివృద్ధి ప్రయోజనాల కోసం ఒక్కో సరుకుకు 20 వస్తువులకు ఇంపార్ట్ లైసెన్స్ నుండి మినహాయింపు అందించినట్లు ప్రభుత్వం తెలిపింది. దిగుమతి చేసిన వస్తువులను పేర్కొన్న ప్రయోజనాల కోసం మాత్రమే ఉపయోగించాలని, విక్రయించకూడదన్న షరతులకు లోబడి ఈ దిగుమతులు అనుమతిస్తామని మంత్రిత్వ శాఖ పేర్కొంది

మరోవైపు ల్యాప్ టాప్స్, ట్యాబ్లెట్లు, కంప్యూటర్లను విదేశాల నుంచి దిగుమతి చేసుకోకుండా ఆంక్షలు విధించిన ప్రభుత్వం ఇందులో మరో మినహాయింపు కూడా ఇచ్చింది. మరేదైనా భారీ వస్తువుల తయారీలో వాడేందుకు అయి ఉంటే వాటికి ఈ ఆంక్షలు వర్తించవని కేంద్రం పేర్కొంది. అలా కాకుండా అనుమతుల్ని దుర్వినియోగం చేసి దిగుమతులు చేసుకుంటే మాత్రం చర్యలు తప్పవని నోటీసుల్లో స్పష్టం చేసింది.