జూనియర్ షిండే ఎంట్రీ: డిప్యూటీ సీఎంగా ఏక్‌నాథ్ కొడుకు- బేరసారాలు

New Maharashtra CM: మహారాష్ట్రలో అసెంబ్లీ ఎన్నికల ఫలితాలు వెలువడి రోజులు గడుస్తోన్నప్పటికీ ఇంకా ముఖ్యమంత్రి ఎవరనేది తేలట్లేదు. ముఖ్యమంత్రి పీఠంపై పీటముడి పడింది. ప్రతిష్ఠంభన కొనసాగుతూనే వస్తోంది. మహారాష్ట్రతో పాటే ఎన్నికలను ఎదుర్కొన్న జార్ఖండ్‌లో గురువారం కొత్త ప్రభుత్వం ఏర్పడబోతోన్నప్పటికీ ఇక్కడ మాత్రం జాప్యం జరుగతోంది.

మహారాష్ట్రలో ముఖ్యమంత్రి అభ్యర్థిని ఎంపిక చేసే విషయంలో స్పష్టత రావాట్లేదు. భారతీయ జనతా పార్టీ అధిష్ఠానం నాన్చుడు ధోరణిని ప్రదర్శిస్తోంది. వరుసగా రెండోసారి ఏక్‌నాథ్ షిండేకు ముఖ్యమంత్రిగా అవకాశం ఇవ్వాలంటూ శివసేన పట్టుబట్టడం దీనికి ప్రధాన కారణం.

సొంతంగా ప్రభుత్వాన్ని ఏర్పాటు చేయడానికి అవసరమైన 145 సీట్ల సంఖ్యా బలం బీజేపీకి లేదు. 149 సీట్లల్లో పోటీ చేసి 132 చోట్ల గెలిచిందీ పార్టీ. షిండే వర్గం శివసేన 81 నియోజకవర్గాల్లో అభ్యర్థులను నిలబెట్టగా 57 మంది గెలుపొందారు. అజిత్ వర్గానికి చెందిన ఎన్సీపీ మొత్తం 59 స్థానాల్లో పోటీ చేయగా 41 సీట్లు ఈ పార్టీ ఖాతాలో పడ్డాయి.

ప్రభుత్వాన్ని ఏర్పాటు చేయాలంటే మిత్రపార్టీల మద్దతు తప్పనసరి కావడంతో ముఖ్యమంత్రి పదవి కోసం శివసేన భీష్మించింది. బీజేపీ అధిష్ఠానం మాత్రం ఉప ముఖ్యమంత్రి దేవేంద్ర ఫడ్నవిస్‌ వైపే మొగ్గు చూపుతోంది. ఎట్టి పరిస్థితుల్లో ఈ దఫా సీఎం పదవి తమ పార్టీకే దక్కాలనే పట్టుదలతో ఉంది బీజేపీ.

ఈ పరిస్థితుల మధ్య శివసేన మరో కొత్త ప్రతిపాదనలను బీజేపీ ముందుకు తీసుకొచ్చినట్లు తెలుస్తోంది. మహాయుటి సర్కార్ కన్వీనర్‌గా షిండే, ఆయన తనయుడు, లోక్‌సభ సభ్యుడు శ్రీకాంత్ షిండేను ఉప ముఖ్యమంత్రిగా నియమించాలనే డిమాండ్ లేవనెత్తింది.

ఈ రెండు ప్రతిపాదనలనూ బీజేపీ తోసిపుచ్చినట్లు ది న్యూ ఇండియన్ ఎక్స్‌ప్రెస్ ఓ కథనాన్ని ప్రచురించింది. దీనికి ప్రతిగా శ్రీకాంత్ షిండేకు కేంద్రమంత్రి పదవి ఇస్తామని, ఏక్‌నాథ్ షిండేను ఉప ముఖ్యమంత్రిగా అపాయింట్ చేయడానికి అంగీకరిస్తానని తెలిపింది. దీన్ని ఏక్‌నాథ్ షిండే తిరస్కరించినట్లు చెబుతున్నారు.

English summary

CM Eknath Shinde wants to be made the convener of the Mahayuti government and Deputy Chief Minister’s post for his son, Shrikant Shinde.