జాక్ పాట్ కొట్టిన నాలుగేళ్ల బాలుడు.. లక్కీ డ్రాలో రూ.53 లక్షల కారు !!

అదృష్టం ఎప్పుడు, ఎవరిని, ఎలా వరిస్తుందో ఎవరూ చెప్పలేరు. ఈ తరహా ఘటనలు ఇప్పటికే చోటు చేసుకోగా.. ఇప్పుడు లేటెస్ట్ గా మధ్యప్రదేశ్‌లో కూడా ఇదే నిజమైంది. కేవలం రూ.201 తో లక్కీ డ్రా కూపన్ కొనుగోలు చేస్తే వారికి ఊహించని రీతిలో భారీ బహుమతి దక్కింది. ఈ ఘటన బర్హాన్‌పూర్ జిల్లా శిలాంపుర ప్రాంతంలో చోటుచేసుకోగా రాష్ట్ర వ్యాప్తంగా హాట్ టాపిక్ గా మారింది.

గర్బా ఉత్సవంలో..

కాగా దసరా సందర్భంగా బర్హాన్‌పూర్‌ లోని అభాపురి ప్రాంతంలో "సర్కార్ ధామ్" ఆధ్వర్యంలో భారీ స్థాయిలో గర్బా ఉత్సవాలు నిర్వహించారు. స్థానికులు పెద్ద ఎత్తున ఈ వేడుకల్లో పాల్గొన్నారు. ఈ క్రమంలోనే నిర్వాహకులు సాంస్కృతిక కార్యక్రమాలతో పాటు లక్కీ డ్రా కూపన్ స్కీమ్ ను కూడా ప్రవేశపెట్టారు. అందులో భాగంగా శిలాంపురకు చెందిన కిరణ్ రాయిక్వార్ అనే మహిళ తన నాలుగేళ్ల మనవడు మేధాన్ష్ పేరుతో రూ.201 చెల్లించి ఒక కూపన్ కొనుగోలు చేశారు.

లక్కీ బాయ్..

తరువాత రోజు నిర్వహించిన లక్కీ డ్రాలో అందరికీ ఆశ్చర్యం కలిగిస్తూ మేధాన్ష్ పేరు ఉన్న కూపన్ విజేతగా ఎంపికైంది. బహుమతిగా టయోటా ఫార్చ్యూనర్ SUV దక్కడం అందరినీ ఆశ్చర్యానికి గురి చేసింది. దాదాపు రూ. 53 లక్షల విలువైన లగ్జరీ కారు.. కేవలం రూ.201 తో దక్కించుకోవడం అదృష్టం అని.. ఆ పిల్లడిని లక్కీ బాయ్ అని అంటూ తెగ పొగిడేస్తున్నారు.

అయితే మధ్యప్రదేశ్‌లో లాటరీలపై నిషేధం ఉంది. కానీ సాంస్కృతిక లేదా ధార్మిక ఉత్సవాల సందర్భంగా నిర్వహించే లక్కీ డ్రాలుపై మాత్రం ఆంక్షలు లేవు. అవి పన్ను చెల్లింపులతో, పారదర్శకంగా నిర్వహిస్తే చట్టపరంగా అనుమతించబడతాయి. ఈ గర్బా ఉత్సవం కూడా స్థానిక అధికారుల అనుమతితో జరిగినట్టు చెబుతున్నారు. ఈ సంఘటన తర్వాత మేధాన్ష్ ఫోటోలు, వీడియోలు సోషల్ మీడియాలో విపరీతంగా షేర్ అవుతున్నాయి.

ఈ మేరకు కిరణ్ రాయిక్వార్ మాట్లాడుతూ.. తమ మనవడు మేధాన్ష్‌కు చిన్నప్పటి నుంచే బొమ్మల కార్లంటే చాలా ఇష్టం. ఎప్పుడూ వాటినే అడుగుతాడు. కానీ ఈసారి అతనికి నిజమైన పెద్ద కారు దక్కింది. ఇది దేవుని వరం అని మేము భావిస్తున్నాం. పేపర్ వర్క్ పూర్తయిన తర్వాత కారు మా ఇంటికి వస్తుందని అన్నారు.

English summary

No one can say when, to whom, or how luck will come. Such incidents have already happened, and now the latest one has come true in Madhya Pradesh. Those who bought a lucky draw coupon for just Rs.201 got an unexpected huge prize.