అద్భుతం!: అవినీతి పోటీలో కూడా దూసుకెళ్లిన భారత్!

International Anti-Corruption Day: టాలీవుడ్ ప్రముఖ హీరో నటించిన ఓ సినిమాలో.. 'ఎక్కడ చూసినా లంచం, లంచం, లంచం' అనే డైలాగ్ ప్రతి ఒక్కరికీ గుర్తుండే ఉంటుంది. అలాగే దేశంలో కూడా అవినీతి రూపురేఖలు మర్రి ఊడల్లా పెరిగిపోయాయి. ఆశ చూపించకపోవతే పని కాని పరిస్థితి ఏర్పడింది. ప్రపంచవ్యాప్తం ప్రతి ఏడాది డిసెంబర్ 9న అంతర్జాతీయ అవినీతి వ్యతిరేక దినోత్సవాన్ని జరుపుకుంటారు. అయితే గత దశాబ్ధంలో ఇండియాలో అవినీతి స్థాయి నిరంతరం పెరుగుతోందని ట్రాన్స్‌పరెన్సీ ఇంటర్నేషనల్ నివేదిక వెల్లడించింది.

ఈ సంస్థ ప్రతి సంవత్సరం ప్రపంచ దేశాల అవినీతిపై నివేదికను విడుదల చేస్తుంది. ఈ నివేదికలో డెన్మార్క్, ఫిన్లాండ్ వంటి దేశాలు చాలా ఏళ్లుగా అవినీతి రహిత దేశాల జాబితాలో అగ్రస్థానంలో కొనసాగుతుండగా.. ఇండియా ర్యాంకింగ్ క్రమంగా పడిపోతూ వస్తోంది.

10 ఏళ్లలో 20 ర్యాంకులు పతనం
ట్రాన్స్‌పరెన్సీ ఇంటర్నేషనల్ 2024 నివేదిక ప్రకారం.. ప్రపంచంలోని 180 దేశాలలో అవినీతి విషయంలో భారతదేశం 96వ స్థానంలో ఉంది. గత ఐదేళ్లలో 2021, 2022లలో 85వ స్థానంలో ఉన్న భారత్... 2023లో 93కి, 2024లో మరింత దిగజారి 96వ స్థానానికి చేరుకుంది. ఇది దేశంలో అవినీతి స్థాయి పెరిగిందనడానికి నిదర్శనం.
*2015 -76వ ర్యాంకు
*2018 -78వ ర్యాంకు
*2020 -86వ ర్యాంకు
*2023 -93వ ర్యాంకు
*2024 -96వ ర్యాంకు

పాకిస్తాన్ పరిస్థితి మరింత దారుణం
ఇండియా పొరుగు దేశమైన పాకిస్తాన్‌లో కూడా గత పదేళ్లలో అవినీతి స్థాయి పెరిగింది. 2015లో 117వ స్థానంలో ఉన్న పాకిస్తాన్... 2021లో 140వ స్థానానికి పడిపోయింది. 2024లో 135వ స్థానంలో ఉన్నప్పటికీ, గత పదేళ్లలో ఇక్కడ అవినీతి స్థాయి పెరిగిందని నివేదిక స్పష్టం చేసింది.
*2015 -117వ ర్యాంకు
*2021 -140వ ర్యాంకు
*2024 -135వ ర్యాంకు

అవినీతిపై చెైనా నియంత్రణ
భారత్, పాకిస్తాన్‌లకు విరుద్ధంగా ఈ నివేదికలో చైనా ర్యాంకింగ్స్‌లో గణనీయమైన మెరుగుదల కనిపించింది. 2015లో 83వ స్థానంలో ఉన్న చైనా... 2024 నాటికి 76వ స్థానానికి చేరుకుంది. ఈ మధ్యకాలంలో కొన్ని హెచ్చుతగ్గులు ఉన్నప్పటికీ, మొత్తం మీద చైనా అవినీతిపై గణనీయమైన నియంత్రణ సాధించిందని నివేదిక పేర్కొంది.
*2015 -83వ ర్యాంకు
*2021 -66వ ర్యాంకు
*2024 -76వ ర్యాంకు

గత పదేళ్లలో భారత్, పాకిస్తాన్‌లలో అవినీతి పెరగగా, చైనా మాత్రం దానిపై ప్రభావవంతంగా నియంత్రణ సాధించింది.

English summary

According to Transparency International’s 2024 Corruption Perception Index, India has fallen to the 96th rank, dropping 20 spots in 10 years. While corruption increased in India and Pakistan, China showed significant improvement.