శానిటరీ ప్యాడ్లలో హానికర రసాయనాలు- వాడితే క్యాన్సర్, షుగర్, గుండె జబ్బులే-షాకింగ్ రిపోర్ట్ !

భారత్ లో ఉత్పత్తి అవుతున్న శానిటరీ ప్యాడ్లలో మోతాదుకు మించి హానికర రసాయనాలు ఉన్నట్లు తాజాగా ఓ అధ్యయనం నిర్దారించింది. ఢిల్లీకి చెందిన ఓ ఎన్జీవో నిర్వహించిన ఈ అధ్యయనంలో పలు సంచలన విషయాలు బయటికి వచ్చాయి. హానికర రసాయనాలతో కూడిన శానిటరీ ప్యాడ్లను వాడటం వల్ల క్యాన్సర్, డయాబెటిస్, గుండె జబ్బులు వస్తున్నట్లు ఈ అధ్యయనం తేల్చింది.

ఢిల్లీకి చెందిన ఓ పర్యావరణ స్వచ్ఛంద సంస్థ చేసిన అధ్యయనం ప్రకారం భారతదేశంలో విక్రయించే ప్రముఖ శానిటరీ నాప్‌కిన్‌లలో గుండె జబ్బులు, మధుమేహం, క్యాన్సర్‌తో ముడిపడి ఉన్న అధిక మొత్తంలో రసాయనాలు కనుగొన్నారు. ప్రస్తుతం మార్కెట్‌లో అందుబాటులో ఉన్న మొత్తం పది నమూనాలు, ఆరు కర్బన రహిత, నాలుగు ఆర్గానిక్ శానిటరీ ప్యాడ్‌లలో థాలేట్స్, అస్థిర కర్బన సమ్మేళనాలు ఉన్నట్లు గుర్తించింది. ఈ ఫలితాలు 'ఋతుసంబంధ వ్యర్థాలు 2022' పేరుతో ఒక నివేదికలో ప్రచురించారు.

థాలేట్‌లకు గురికావడం వల్ల మహిళల్లో ఎండోక్రైన్ అంతరాయం, గుండె, పునరుత్పత్తి వ్యవస్థలపై ప్రభావం, మధుమేహం, కొన్ని క్యాన్సర్‌లు, పుట్టుకతో వచ్చే లోపాలు వంటి అనేక రకాల ఆరోగ్య సమస్యలు తలెత్తుతున్నట్లు ఈ అధ్యయనంలో గుర్తించారు. అలాగే మెదడు బలహీనత, ఉబ్బసం, వైకల్యాలు, కొన్ని క్యాన్సర్లు, పునరుత్పత్తి వ్యవస్థ పనితీరుపై ప్రమాదాన్ని పెంచుతోందని కూడా తేల్చారు.

ఆర్గానిక్ గా చెబుతున్న పలు శానిటరీ న్యాప్‌కిన్‌లలో అత్యధిక మొత్తంలో థాలేట్లు కనుగొన్నారు. ఈ అధ్యయనం ప్రకారం అన్ని రకాల శానిటరీ న్యాప్‌కిన్‌లు ఆర్గానిక్, ఇనార్గానిక్ లోనూ థాలేట్స్ ఉనికి ఉన్నట్లు గుర్తించారు. సేంద్రీయ, కర్బన రహిత నమూనాలో థాలేట్‌ల కలయిక సాంద్రతలు 0.0321, 0.0224 గ్రాములుగా గుర్తించారు. ఇది ఈయూ నిబంధనల ప్రకారం నిర్దేశించబడిన ఉత్పత్తి బరువుతో పోలిస్తే 0.1% కంటే ఎక్కువ అని అధ్యయనం తెలిపింది. శానిటరీ నాప్‌కిన్‌ల నమూనాలు మొత్తం 25 అస్థిర కర్బన సమ్మేళనాలు (VOCలు) ఉన్నాయని తేలింది. వీటిలో అసిటోన్, క్లోరోఫామ్, బెంజీన్, టోల్యున్, ఇతర సమ్మేళనాలు కర్బన రహిత, సేంద్రీయంగా చెబుతున్న అన్ని నమూనాలలోనూ కనుగొన్నారు.

English summary

a recent study conducted by an delhi based ngo reveals that sanitary napkins in india have high amount of harmful chemicals which causes cancer, diabetis and heart disorders.