ఎర్లీ వింటర్ వచ్చేస్తోందా? 25 ఏళ్లలో ఎన్నడూ లేని విధంగా ఉష్ణోగ్రతలు!
దేశ రాజధాని ఢిల్లీలో వాతావరణం ఒక్కసారిగా చల్లబడిపోయింది. గత 25 ఏళ్లలో ఎన్నడూ లేనివిధంగా సెప్టెంబర్ నెలలో కనిష్ట ఉష్ణోగ్రతలు భారీగా పడిపోయాయి. ఏకంగా 2001 తర్వాత అత్యంత కనిష్టంగా ఆదివారం రాత్రి ఢిల్లీలో 21 డిగ్రీల సెల్సియస్ ఉష్ణోగ్రత నమోదైంది. గత కొన్ని రోజులుగా కురుస్తున్న విస్తారమైన వర్షాలు, ఆకాశం పూర్తిగా మేఘావృతం కావడంతో ఒక్కసారిగా వాతావరణం మారిపోయింది. దీంతో ఇళ్లలో ఏసీలు బంద్ అయిపోయాయి, ఫ్యాన్ల వేగం తగ్గింది. అసలు ఈ సమయంలో చలి పెరగడానికి కారణం ఏమిటి? ఈసారైనా శీతాకాలం త్వరగా వచ్చేస్తోందా? అని సామాన్యుల నుంచి నిపుణుల వరకు అందరూ ఆశ్చర్యపోతున్నారు.
ఎల్ నినో ప్రభావమా? అసలు కారణం వేరే ఉందా?
ఉష్ణోగ్రతలు పడిపోవడానికి ఎల్ నినో ప్రభావం ఏమైనా ఉందా లేక ఎర్లీ వింటర్ సంకేతమా అనే చర్చ జోరుగా సాగుతోంది. అయితే దీనికి ఎల్ నినోతో ఎలాంటి సంబంధం లేదని వాతావరణ నిపుణులు స్పష్టం చేస్తున్నారు. ఇది కేవలం తాత్కాలిక వాతావరణ మార్పు మాత్రమేనని తేల్చిచెప్పేశారు. బంగాళాఖాతంలో ఏర్పడిన వాయుగుండం సుదీర్ఘకాలం పాటు ప్రభావం చూపడం వల్లే దేశవ్యాప్తంగా భారీ వర్షాలు కురిశాయని, అదే ఈ చల్లటి వాతావరణానికి అసలు కారణమని నిపుణులు వెల్లడించారు.
బంగాళాఖాతం వాయుగుండం ఎఫెక్ట్.. దేశవ్యాప్తంగా వర్షాలు
నైరుతి రుతుపవనాలు తిరోగమనం చెందుతున్న ఈ తరుణంలో బంగాళాఖాతం నుంచి వచ్చిన ఒక సుదీర్ఘమైన లోతట్టు వాయుగుండం దేశవ్యాప్తంగా విస్తారంగా వర్షాలు కురిపించింది. ఒడిశా, ఆంధ్రప్రదేశ్ నుంచి మొదలుకుని తెలంగాణ, మహారాష్ట్ర, మధ్యప్రదేశ్, ఉత్తరప్రదేశ్, బిహార్, జార్ఖండ్, పశ్చిమ బెంగాల్తో పాటు ఈశాన్య రాష్ట్రాలు, అటు ఢిల్లీ, హర్యానా, రాజస్థాన్ను కూడా ఈ వాయుగుండం చుట్టేసింది. నిరంతరం వర్షాలు కురవడం, ఆకాశం మేఘాలతో కమ్ముకుని ఉండటం వల్ల ఎండ వేడి తగ్గి వాతావరణం ఒక్కసారిగా చల్లబడిపోయింది.
మళ్లీ ఎండలు వచ్చే అవకాశం.. కొత్త అల్పపీడనం రాక
ఈ వాతావరణ వ్యవస్థ క్రమంగా బలహీనపడుతుండటంతో రానున్న రోజుల్లో పరిస్థితి మళ్లీ సాధారణ స్థితికి రానుంది. సెప్టెంబర్ 30, అక్టోబర్ 1 నాటికి పంజాబ్, హర్యానా, ఢిల్లీ, రాజస్థాన్, ఉత్తరప్రదేశ్ ప్రాంతాలలో ఎండ తీవ్రత మళ్లీ పెరిగే అవకాశం ఉంది. అయితే మరోవైపు మయన్మార్ సమీపంలో మరో అల్పపీడనం ఏర్పడే సూచనలు కనిపిస్తున్నాయి. ఇది ఈశాన్య బంగాళాఖాతం మీదుగా దేశంలోకి ప్రవేశించి తూర్పు ఉత్తరప్రదేశ్, బీహార్, జార్ఖండ్, ఒడిశా ప్రాంతాలపై ప్రభావం చూపవచ్చని అంచనా వేస్తున్నారు.
ఎర్లీ వింటర్ రావడం లేదు.. ఆందోళన వద్దు
ఢిల్లీలో నమోదైన ఈ చల్లటి రాత్రి ఉష్ణోగ్రతలను చూసి ఈసారే శీతాకాలం త్వరగా వచ్చేస్తోందని భయపడాల్సిన అవసరం లేదని వాతావరణ శాఖ చెబుతోంది. ఇదొక తాత్కాలిక పరిణామం మాత్రమేనని, దీనికి ఎల్ నినోకు ఎలాంటి లింక్ లేదని స్పష్టం చేసింది. త్వరలోనే వాతావరణం మళ్లీ సాధారణ స్థితికి చేరుకుంటుందని, ఎండల తీవ్రత పునరుద్ధరిస్తుందని నిపుణులు భరోసా ఇస్తున్నారు.
Click it and Unblock the Notifications
Sign in with Google
