పోలీస్ హెల్ప్‌లైన్‌కు పోర్న్ క్లిప్స్: దర్యాప్తు చేయాలని..

న్యూఢిల్లీ: ఓ ప్రబుద్ధుడు ఏకంగా అవినీతి నిరోధక పోలీస్ హెల్ప్‌లైన్‌కే పోర్న్ క్లిప్స్(శృంగార చిత్రాలు)ను వాట్సప్ ద్వారా పంపించాడు. అంతేగాక తాను పంపించిన వీడియో క్లిప్స్‌పై దర్యాప్తు జరపాలని కోరాడు. ఇక పోలీసులు ఊరుకుంటారా? దర్యాప్తు జరిపి అతడ్ని బుధవారం సాయంత్రం జైలుకు తరలించారు. ఈ ఘటన ఢిల్లీలో చోటు చేసుకుంది.

సాధారణంగా పోలీసులు తమకు అందిన ప్రతి వీడియో, అడియో క్లిప్స్‌ను పరిశీలించి, దర్యాప్తు జరిపిన తర్వాత ఆ నివేదికను ఫోరెన్సిక్ ల్యాబ్‌కు పంపిస్తారు. అక్కడ నివేదిక ప్రామాణికత నిర్ధారించబడుతుంది. అనంతరం కేసుకు సంబంధించిన చర్యలు తీసుకుంటారు. ఈ పోలీస్ ప్రత్యేక విభాగాన్ని ఆగస్టు 6న ప్రారంభించారు. కాగా, తమకు నిందితుడి వద్ద వచ్చిన ఈ పోర్నోగ్రాఫిక్ చిత్రాలను చూసిన పోలీసులు ఒక్కసారిగా అవాక్కయ్యారు.

దీంతో ఆ వీడియో క్లిప్స్ పంపిన వ్యక్తిపై బరఖంభ రోడ్ పోలీస్ స్టేషన్‌లో మంగళవారం రాత్రి కేసు నమోదైంది. ఆ తర్వాత నిందితుడి గురించిన దర్యాప్తు జరిపారు. వీడియో క్లిప్స్ పంపిన నెంబర్‌ను ట్రాక్ చేసిన పోలీసులు బుధవారం సాయంత్రం ఫరీదాబాద్‌లో నిందితుడ్ని అరెస్ట్ చేశారు. నిందితుడు మహేందర్ 10వ తరగతి వరకు చదవాడనీ, ఆ తర్వాత ఓ మాల్‌లో పనిచేస్తున్నాడని స్థానికులు చెప్పారు.

కాగా, ఆ వీడియో క్లిప్స్‌ను అతడు తమకెందుకు పంపించాడని పోలీసులు విచారణ జరుపుతున్నారు. మద్యం మత్తులో పని చేసి ఉంటాడని అనుమానిస్తున్నారు. అయితే మహేందర్ మాత్రం.. పోర్నోగ్రాఫిక్ పరిశ్రమను లేకుండా చేయాలనే ఉద్దేశంతోనే పోలీసులకు ఈ వీడియో క్లిప్స్‌ను పంపించానని తెలిపాడు.

English summary

A man has been arrested for sending a sexually explicit video through whatsapp on Delhi Police's anti-corruption helpline.