MK Stalin: ఓటమిపై నోరువిప్పిన ఎంకే స్టాలిన్- కీలక నిర్ణయం..!

తమిళనాడు అసెంబ్లీ ఎన్నికల్లో అనూహ్యంగా ఎదురైన ఘోర పరాజయంపై ముఖ్యమంత్రి ఎంకే స్టాలిన్ (MK Stalin) ఎట్టకేలకు నోరు విప్పారు. ఉదయం నుంచీ మౌనంగా ఉన్న ఆయన.. సాయంత్రం ఈ మేరకు పరాజయాన్ని అంగీకరిస్తూ ట్వీట్ చేశారు. ప్రజల తీర్పుకు తలవంచి అంగీకరిస్తున్నామని, విజేతలకు అభినందనలు అంటూ ట్వీట్ చేశారు. గత ఐదేళ్లలో ఎన్నో ప్రాజెక్టులను రూపొందించి, తమిళనాడు ప్రజలకు సుపరిపాలన అందించామని, తమిళనాడును అన్ని విధాలుగా ఉన్నత స్థాయికి తీసుకువెళ్లామని ఆయన తెలిపారు.

ఎన్నికల బరిలో తాము సాధించిన విజయాల గురించి మాట్లాడుతూ మాత్రమే ఓట్లు అభ్యర్థించామని, ప్రజలకు అందించిన సంక్షేమ పథకాలు కొనసాగేలా చూసేందుకే ఓట్ల కోసం ప్రచారం చేశామని స్టాలిన్ గుర్తుచేశారు. ద్రవిడ మున్నేట్ర కజగం నేతృత్వంలోని లౌకిక ప్రగతిశీల కూటమికి మద్దతునిచ్చి, ఓటు వేసిన తమిళనాడు ప్రజలందరికీ హృదయపూర్వక ధన్యవాదాలు తెలిపారు. తాను కేవలం ఓటు వేసిన వారి కోసమే కాకుండా, ఓటు వేయడం మరిచిపోయిన వారి కోసం కూడా పాలించానని వెల్లడించారు. తాను ప్రజలందరికీ నిజాయితీగా ఉన్నానని, తమ మనస్సాక్షికి అనుగుణంగానే నడుచుకున్నానని స్టాలిన్ తెలిపారు.

மக்கள் தீர்ப்பைத் தலைவணங்கி ஏற்கிறோம். வெற்றி பெற்றவர்களுக்கு வாழ்த்துகள்!

கடந்த ஐந்தாண்டு காலத்தில் ஏராளமான திட்டங்களை உருவாக்கி, தமிழ்நாட்டு மக்களுக்கு நல்லாட்சியை வழங்கினோம். தமிழ்நாட்டை அனைத்து வகையிலும் உயர்த்தினோம். தேர்தல் களத்தில் எங்களது சாதனைகளைச் சொல்லியே வாக்குகளைக்… pic.twitter.com/CCsVdwJX0A

— M.K.Stalin - தமிழ்நாட்டை தலைகுனிய விடமாட்டேன் (@mkstalin) May 4, 2026

తన శక్తికి మించి శ్రమించానని, తన లాగే క్షేత్రస్థాయిలో శ్రమించి, తన ఆత్మతో విడదీయరాని సంబంధం ఉన్న నాయకుడు కరుణానిధి ప్రియమైన సహచరులకు హృదయపూర్వక ప్రగాఢ కృతజ్ఞతలు తెలిపారు. తమతో భుజం భుజం కలిపి నిలిచిన స్నేహ ఉద్యమ నాయకులకు, అధికారులకు, కార్యకర్తలందరికీ ధన్యవాదాలు తెలిపారు. తన రాజకీయ జీవితంలో గొప్ప విజయాలను చూశానని, అపజయాలను కూడా చవిచూశానని స్టాలిన్ పేర్కొన్నారు. అందువల్ల, కేవలం గెలుపు ఓటములు కాదు, ఆదర్శాలు, విధానాలే అత్యంత ముఖ్యమైనవనే అవగాహనతో తాను వ్యవహరిస్తానన్నారు. ఆ విధంగా డీఎంకే రాజకీయ ప్రస్థానం ఎలాంటి ఆటంకాలు లేకుండా కొనసాగుతుందన్నారు. ఇప్పటివరకు ప్రజలకు ఆదర్శప్రాయమైన పాలక పార్టీగా పనిచేసిన డీఎంకే, ఇకపై ఆదర్శప్రాయమైన ప్రతిపక్ష పార్టీగా పనిచేస్తుందన్నారు.