వైరల్ వీడియో: కుక్కను చంపి.. కళ్లు పీకి.. గోలీలు ఆడాడు

కళ్లు పీకి గోలీలు ఆడుకుంటాం.. అని సామెతగా వాడుతారు. ఓ వ్యక్తి దాన్ని నిజం చేశాడు. ఓ వ్యక్తి వీధి కుక్కపై క్రూరత్వానికి పాల్పడ్డాడు. వీధి కుక్కను దారుణంగా చంపేశాడు. దాని కనుగుడ్లు పీకి గోలీలు ఆడుకున్నాడు. ఇదంతా పబ్లిక్ లో రోడ్డుపైనే అందరూ చూస్తుండగానే చేశాడు. ఇది చూసిన ప్రజలు భయాందోళనకు గురయ్యారు. ఆ వ్యక్తి వైపునకు వెళ్లేందుకు భయపడ్డారు. ఈ ఘటనపై పోలీసులకు సమాచారం ఇవ్వగా నిందితుడ్ని అరెస్ట్ చేసి యానిమల్స్ చట్టం కింద కేసు నమోదు చేశారు.

ముంబై సబ్ అర్బన్ లోని ముంబ్రాలో షాకింగ్ ఘటన జరిగింది. ఓ వ్యక్తి అటుగా వెళ్తున్న వీధి కుక్కను దారుణంగా చంపేసి దాన్ని కళ్లు పీకాడు. వాటితో ఆటలాడుతూ కనిపించాడు. పోలీసులు తెలిపిన వివరాల ప్రకారం ఈ ఘటన సెప్టెంబర్ 16న జరిగింది. వీధిలో వెళ్తున్న కుక్కపై దాడి చేసి చంపి.. అందరూ చూస్తుండగానే ఆ కుక్క కళ్లను పీకేశాడు. వాటిని చేతిలో పట్టుకుని ఆడుకున్నాడు. ఈ దృశ్యాలు చూసి భయబ్రాంతులకు లోనైన చుట్టుపక్కన ప్రజలు వెంటనే ముంబ్రా పోలీసులకు సమాచారం అందించారు.

ప్రస్తుతం సామాజిక మాధ్యమాల్లో ఈ ఘటనకు సంబంధించిన వీడియోలు వైరల్ గా మారాయి. ఈ విషయం తెలుసుకున్న యానిమల్ వెల్ఫేర్ గ్రూప్ వెంటనే ముంబ్రా పోలీస్ స్టేషన్ కు చేరుకుంది. నిందితుడ్ని కఠినంగా శిక్షించాలని డిమాండ్ చేసింది. నిందితుడిపై ఐపీసీ సెక్షన్ 325 కింద పోలీసులు కేసు నమోదు చేశారు.