SpaDex mission:ఏడాది చివర్లో దుమ్ము దులిపిన ఇస్రో..నాలుగో దేశంగా ఘనత

భారత అంతరిక్ష పరిశోధన సంస్థ ఇస్రో ఏడాది చివర్లో మరో ప్రయోగానికి శ్రీకారం చూట్టింది. ఇస్రో ప్రతిష్టాత్మకంగా తీసుకున్న స్పేడెక్స్‌ మిషన్ విజయవంతంగా నింగిలోకి దూసుకువెళ్లింది. PSLV C-60 రాకెట్ రెండు కృత్రిమ ఉపగ్రహాలను చేజర్ (SX01),టార్గెట్‌ (SDX02)లను అంతరిక్షంలోకి మోసుకెళ్లింది. ఈ రెండు ఉపగ్రహాల బరువు 440 కిలోలు. సోమవారం రాత్రి సరిగ్గా 10 గంటల 15 నిమిషాలకు ఆంధ్రప్రదేశ్‌లోని శ్రీహరికోటలోని సతీష్ ధావన్ అంతరిక్ష కేంద్రం నుంచి ప్రయోగం విజయవంతమైంది.

ఇది స్పేస్‌ డాకింగ్‌ ఎక్స్‌పెరిమెంట్‌ (స్పేడెక్స్‌) పేరిట జంట ఉపగ్రహాలను భూ కక్ష్యలో అనుసంధానం చేసే బృహత్తర ప్రయోగం కావడం విశేషం. స్పేస్‌క్రాఫ్ట్‌ను డాకింగ్, అన్‌డాకింగ్ చేసేందుకు అవసరమైన టెక్నాలజీ అభివృద్ధి, ప్రదర్శన స్పేడెక్స్ మిషన్ ప్రధాన లక్ష్యమని శాస్త్రవేత్తలు చెబుతున్నారు. పీఎస్‌ఎల్వీ ద్వారా ప్రయోగించిన రెండు చిన్న వ్యోమ నౌకలను అంతరిక్షంలోనే ఒకదానితో ఒకటి డాకింక్‌ చేయించడం ఈ మిషన్‌ ప్రధాన లక్ష్యం.

చంద్రుడిపై వ్యోమగామిని దించడం, చంద్రుడు నుంచి మట్టిని తీసుకురావడం, సొంత అంతరిక్ష కేంద్రం నిర్మించాలన్న భారత్‌ కల సాకారం కావాలంటే.. వ్యోమ నౌకల డాకింగ్‌, అన్‌ డాకింగ్‌ సాంకేతికత ఎంతో అవసరమని ఇస్రో పేర్కొంది. ఈ ప్రయోగం విజయవంతమైతే... ఈ సాంకేతికతను కలిగిన నాలుగో దేశంగా భారత్‌ నిలవనుంది. ఇప్పటికే అమెరికా, రష్యా, చైనా దేశాలు ఈ సాంకేతికతను కలిగి ఉన్నాయి.

English summary

Isro launched successful PSLV-C60 Spadex Space Docking.